सहोदर दाजुभाइले जिते दुई गाउँपालिका अध्यक्ष

काठमाडौं- गत शुक्रबार सम्पन्न स्थानीय तहको निर्वाचनमा दुई फरक जिल्लाका फरक-फरक गाउँपालिका अध्यक्षमा दाजुभाइ नै विजयी भएका छन्। १ धनकुटा र ओखलढुंगा जिल्लाबाट दाजुभाइले नै गाउँपालिका अध्यक्ष जितेका हुन्।

दाजु जितेन्द्र रुम्दाली (राई)ले धनकुटाको साँगुरीगढी गाउँपालिका र भाइ ज्ञानेन्द्र रुम्दालीले ओखलढुंगाको मानेभन्ज्याङ गाउँपालिकाबाट जित हासिल गरेका छन्। 

ज्ञानेन्द्रले कांग्रेसको समर्थनमा स्वतन्त्र उम्मेदवारी दिएका थिए। उनले एमालेका रुपलाल तामाङलाई १ हजार २ सय ६ मतान्तरले जितेका छन्। ज्ञानेन्द्रले ५ हजार २१ मत ल्याउँदा एमालेका तामाङले ३ हजार ८ सय १५ मत प्राप्त गरेका हुन्।

उता गठबन्धनको तर्फबाट धनकुटाको साँगुरीगढी गाउँपालिकामा कांग्रेसको तर्फबाट उम्मेदवारी दिएका जितेन्द्रले ५ हजार ३ सय ९९ मत प्राप्त गरेका छन्। उनका निकटतम प्रतिद्वन्द्वी नेकपा एमालेका कुमारजंग याखाले ४ हजार ८ सय २८ मत प्राप्त गरे।