जनार्दन शर्माको वडा कांग्रेसले जित्यो

काठमाडौं– अर्थमन्त्रीसमेत रहेका नेकपा माओवादी केन्द्रका नेता जनार्दन शर्माको वडामा नेपाली कांग्रेसले  जित हात पारेको छ। रुकुम पश्चिमको मुसीकोट नगरपालिका–५ मा नेपाली कांग्रेसका उम्मेदवार समिरजंग मल्लले जित हात पारेका हुन्।

उनले निकटतम प्रतिद्वन्द्वी माओवादी केन्द्रका सुशील गौतमलाई ८४ मतले पछि पार्दै जित सुनिश्चित गरेका हुन्। नेपाली कांग्रेसका उम्मेदवार मल्लले ५०८ मत पाउँदा माओवादी केन्द्रका गौतमले ४२४ मत प्राप्त गरेका छन्।

सदस्यहरुमा पनि कांग्रेस–एमाले गठबन्धनका ४ जना सदस्य निर्वाचित भएका छन्। नेपाली कांग्रेसबाट खुल्ला महिला सदस्य  टिका देवकोटा ४९४, दलित महिला सदस्य प्रतिभा नेपाली ४८२, वडा सदस्य कालीबहादुर खत्री ४४६ र बमकुमारी ओली केसी ४३७ मत ल्याएर विजयी भएका छन्।

उक्त वडामा जम्मा  ९८४  मत खसेको थियो। मुसीकोट नगरपालिकामा माओवादी केन्द्र, एकीकृत समाजवादी र जनता समाजवादीको चुनावी गठबन्धनका विरुद्ध नेपाली कांग्रेस र एमालेको गठबन्धन चुनावी प्रतिपर्धामा थियो।