५४ वटा मतपत्र हराएपछि शिवसताक्षीमा निर्वाचन अधिकृत नै फेरिँदै

काठमाडौं– ५४ मतपत्र हराएको विवादले झापाको शिवसताक्षी नगरपालिकाका निर्वाचन अधिकृत नै फेरिने अवस्था सिर्जना भएको छ। जिल्ला निर्वाचन कार्यलय झापाका अनुसार हालका निर्वाचन अधिकृत ऋषि पौडेलले काम गर्न असहज भएको प्रतिवेदन पठाएपछि नयाँ अधिकृत पठाउने बारे छलफल भइरहेको छ। 

‘त्यहाँ मतपत्र हराएको विवाद भएपछि मतगणना रोकिएको छ,’ जिल्ला निर्वाचन कार्यलय झापाका प्रमुख तुलसी नेपालले नेपाल समयसँग भने, ‘अहिलेका निर्वाचन अधिकृतले आफूलाई मतगणना गर्न असहज हुने प्रतिवेदन पठाउनुभएपछि अहिले त्यो निर्वाचन आयोगमा पुगेको छ। अहिले आयोगमा त्यसबारे छलफल भइरहेको अवस्था हो।’ 

खसेको मत र गणना भएको मतमा फरक आएपछि आइतबार रातिबाटै झापाको शिवसताक्षीमा मतगणना रोकिएको हो।  वडा नम्बर–१ को मतगणना गर्दा ५४ मतपत्र हराएको भन्दै नेकपा माओवादी केन्द्रका वडाध्यक्षका उम्मेदवार दुर्गा नेम्वाङले आपत्ति जनाएपछि त्यहाँ माओवादी कार्यकर्ताले नारावाजी समेत गरेका थिए। यहाँ एमालेको प्यानल नै विजयी भइसकेको छ । विजयी भइसकेपछि मात्रै मतपत्र हराएको खबर बाहिरिएको थियो। 

उक्त वडामा तीन हजार ८२ मत खसेको मुचुल्का छ। तर, मतगणनाका वेला भने तीन हजार २८ मतपत्र मात्र भेटिएको थियो ।