बुटवल–१ मा 'पुतली'ले जितेपछि...

बुटवल– बुटवल उपमहानगरपालिकामा पहिलो जित स्वतन्त्र उम्मेदवारले निकालेका छन्। नेपाली कांग्रेसबाट टिकट नपाएपछि बागी बनेर बुटवल उपमहानगरपालिका वडा नम्बर १ मा ६० वर्षिय नरेन्द्र बस्नेत उम्मेदवार बनेका थिए। 

बस्नेत ६३६ मतका साथ विजयी भएका हुन्। उनका निकटता प्रतिद्वन्द्वी नेकपा एमालेका महेन्द्र लिगलले ५५१ मत ल्याए। लिगल २०७४ सालमा एमालेबाट वडाध्यक्षमा निर्वाचित भएका थिए। नेपाली कांग्रसका माधव प्रधानले ३४८ मत मात्रै प्राप्त गरे। निर्वाचन आयोगले भने जितको घोषणा गर्न बाँकी छ। 

समाजमा भिजेका बस्नेतले जनताको सेवा गरेका कारण मत पाएको बताइएको छ। बुटवल १ को मतगणना सकिँदासम्म बुटवलमा मेयरमा नेपाली कांग्रेसका खेलराज पाण्डेले अग्रता लिएका छन्।

बुटवलमा यसअघि विजयी भएको एमालेलाई उछिन्दै राप्रपाका उम्मेदवार मृगेन्द्र शेरचन दोस्रो बनेका छन्। एमालेका बाबुराम भट्टराई तेस्रो नम्बरमा छन्।