धेरैजसो स्थानमा मतगणना सौहार्दपूर्ण, केही ठाउँमा विवादले स्थगित

काठमाडौं– हिजो शुक्रबार देशभरका ७५३ वटै स्थानीय तहमा एकै चरणमा भएको निर्वाचनपछि मतगणना चलिरहेको छ। धेरैजसो ठाउँमा सौहार्दपूर्ण रुपमा मतगण्ना भइरहेको छ। केही स्थानमा भने विवादका कारण स्थगित पनि भएको छ। 

म्याग्दीको तातोपानी गाउँपालिकामा कांग्रेस र माओवादीबीच विवाद हुँदा मतगणना स्थगित भएको छ। ललितपुरको महाँकाल गाउँपालिकाको मतगणना पनि रोकिएको छ।

उता गोरखाको चुमनुब्रीमा मतपेटिका नै गणनास्थलमा ल्याइएको छैन। मतपेटिका बोकेर ल्याउनुपर्ने भएकाले समय लागेको हो। त्यहाँ मतगणना सुरु गर्न अझै दुई दिन लाग्ने बताइएको छ।

इलामको देउमाई नगरपालिकाको मतगणनाको क्रममा विवाद उत्पन्न भएको छ। मतगणनास्थलमा नगरपालिकाका एक जना कर्मचारीको साथमा स्वस्तिक छाप र मोबाइल भेटिएपछि विवाद उत्पन्न भएको हो।

मतगणनास्थलबाहिर झडपको अवस्था सिर्जना भएको छ। गठबन्धन दलका नेता कार्यकर्ताले पुनः मतदानको माग गरेका छन्। स्थितिलाई नियन्त्रणमा लिन प्रहरीले २ राउन्ड हवाई फायर गरेको छ।