६४ प्रतिशत मतदान भएको अनुमान, ४४ वटा केन्द्रमा स्थगित

काठमाडौं– आज शुक्रबार भएको स्थानीय तह निर्वाचनमा ६४ प्रतिशत मत खसेको अनुमान निर्वाचन आयोगले गरेको छ। देशभरबाट विस्तृत विवरण आइनसकेकोले यो आँकडा थपघट हुन सक्ने आयोगले जनाएको छ। 

आज देशभरका ७५३ वटै स्थानीय तहमा मतदान भएको थियो। २८ वटा मतदानस्थलका ४४ वटा केन्द्रको निर्वाचन भने विभिन्न कारणले स्थगित भएको आयोगले जनाएको छ।

प्रमुख निर्वाचन आयुक्त दिनेश थपलियाले भने, ‘कतिपय ठाउँमा अहिले पनि मतदान भइरहेको छ। देशभरको यकिन तथ्यांक आइसकेको छैन, तर हामीले संकलन गरेको प्रारम्भिक तथ्यांकअनुसार ६४ प्रतिशत मतदान भएको छ।’

उनका अनुसार काठमाडौंमा ५२ प्रतिशतमात्रै मतदान भएको छ। ‘यो प्रारम्भिक तथ्यांक हो, बढ्न पनि सक्छ। तर हामी यो तथ्यांकमा खुसी छैनौं। आयोगले अनुमान गरेकोभन्दा यो फरक तथ्य हो,’ उनले भने। आयोगले ६५ देखि ७० प्रतिशतसम्म मतदान हुने अनुमान गरेको थियो।

प्रमुख निर्वाचन आयुक्त थपलियाले एकैपटक निर्वाचन हुँदा सुरक्षा प्रबन्धमा समस्या भएको महसुस भएको बताए। राजनीतिक दल र उम्मेदवारबाट समेत असहयोग भएको उनले बताए।