मतदान गर्न चिटको सहारा

भरतपुर– मतदाता शिक्षा पर्याप्त नभएपछि राजनीतिक दलले मतदातालाई चिट चोराउँदै मतदान गर्न लगाएका छन्। भरतपुरका केही मतदान केन्द्रमा मतदातालाई गठबन्धन दलको नमुना मतपत्रको चिट सहित मतदान केन्द्रमा छिराएर सोही अनुसार भोट हाल्न लगाएका छन्। 

मतदाताहरुले मतदान गर्ने कोठाको भेउ नपाउँदा गठबन्धन दलले बनाएको चिट चोरेर असम्बन्धित व्यक्तिले समेत मतदान गरेका छन्। भरतपुर महानगरमा गठबन्धन दलले मतदान गर्नका लागि सजिलो हुनेगरी नमुना मतपत्रको केही भाग छापेर चिट बनाएका छन्। 

मतदान गर्नका लागि  सजिलो हुनेगरी आफ्नो दलको चुनाव चिह्न मात्रै राखेर सानो नमुना मतपत्र बनाएर भोट हालेको भन्ने गुनासो मुख्य निर्वाचन अधिकृतको कार्यालयमा पनि पुगेको छ। कार्यालयका सूचना अधिकारी पुरुषोत्तम पौडेलले भने,  ‘मतपत्रको केही अंशमा मात्रै चिन्ह लगाएर मतदान गर्नका लागि उक्त चिट लिएर गएको भन्ने गुनासो आएको छ। मतदानको दिन मतदान अधिकृतलाई कारबाहीको अधिकार हुन्छ, हामीले मतदान अधिकृतलाई नै कारबाहीको जिम्मा दिएका छौं।’

कृष्णपुरमा केही मतदाताको गोजीमा नमुना मतपत्रको चिट फेला परेपछि सुरक्षाकर्मीले उक्त चिट भित्र लैजान दिएका छैनन्। सूचना अधिकृत पौडेलका अनुसार मतदाता शिक्षाबारे जानकारी नभएर यो समस्या आएको हो। मतपत्रको नमुनाको केही भागमात्रै छापेर चिन्ह लगाएर मतदान केन्द्र भित्र गएको भन्ने गुनासो आएपछि कार्यालायले त्यस्ता गतिविधि रोक्न भनेको छ। चिट फेला परेपछि केही मतदाताहरुले प्रतिवाद गरेका थिए।