काठमाडौं– मुस्लिम आयोगका अध्यक्ष समिम मियाँ अन्सारीलाई पैसा बाँडेको आरोपमा पक्राउ गरिएको खबर झुटो भएको प्रहरीले बताएको छ। जिल्ला प्रहरी कार्यालय धनुषाका एसपी वसन्त रजौरेका अनुसार मियाँलाई उनी बसेको होटलमा विवाद सिर्जना भएपछि सुरक्षा दिइएको हो।
‘बाहिर आएको खबर एकदमै गलत हो,’ एसपी रजौरेले भने, ‘खासमा त्यहाँ दुक्ष पक्षबीच विवाद भइरहेको रहेछ। उहाँलाई हामीले संरक्षण दिएर एयरपोर्टसम्म पुर्याएका मात्रै हौं। अरु केही पनि होइन।’
मियाँ जनकपुरधामको बसपार्कस्थित होटल सीताशरणको ३०५ नम्बर कोठामा बसिरहेका थिए। प्रहरीले होटलबाट निकालेको तस्बिर बाहिरिएपछि उनलाई पक्राउ गरिएको खबर फैलिएको थियो। मियाँले मतदाता रिझाउन पैसा बाँडेको आरोप लगाउँदै जनकपुर एमालेका कार्यकर्ताहरु उनी बसेको होटल घेराउ गरेपछि त्यहाँ तनावको स्थिति सिर्जना भएको थियो। त्यही कारण प्रहरी त्यहाँ पुगेर मियाँलाई सुरक्षा दिएको प्रहरीको भनाइ छ।