काठमाडौं– स्थानीय निर्वाचनको पूर्वसन्ध्यामा मुस्लिम आयोगका अध्यक्ष पक्राउ परेका छन्। मौन अवधिको समयमा मतदातालाई रकम बाँडेको आरोपमा अध्यक्ष समिम मियाँ अन्सारी पक्राउ परेका हुन्।
आज बिहान उनलाई धनुषा प्रहरीले जनकपुरधामस्थित सीतासरण होटलबाट नियन्त्रणमा लिएको हो। ०७५ साल चैतमा तत्कालीन प्रधानमन्त्री केपी शर्मा ओलीले उनलाई आयोगको अध्यक्षमा नियुक्त गरेका थिए।
अध्यक्ष अन्सारी बसेको होटलमा पैसा बाँडिएको भन्दै स्थानीय बासिन्दा र नेकपा एमालेका कार्यकर्ताले होटल घेराउ गरेका थिए।
अन्सारीसँगै रहेका पाँच जनालाई एमाले कार्यकर्ताले होटलमै थुनेर राखेपछि प्रहरीले बल प्रयोग गरेको थियो।
अध्यक्ष सन्सारीसहित पाँचै जनालाई प्रहरी टोलीले नियन्त्रणमा लिएको छ। त्यसक्रममा प्रहरी र एमाले कार्यकर्ताबीच धक्कामुक्की पनि भएको थियो।