'शंकास्पद' अवस्थामा भेटिएकी मेयर उम्मेदवारकी श्रीमती आफन्तको जिम्मामा

बुटवल- सुकुम्बासी बस्तीमा शंकास्पद अवस्थामा भेटिएकी नेकपा एमाले बुटवल मेयर उम्मेदवार बाबुराम भट्टराईकी श्रीमती माया भट्टराईलाई प्रहरीले आफन्तको जिम्मा लगाएको छ। एमाले उम्मेदवारकी श्रीमती माया मौन अवधिका बेला बुटवल–११ को सुकुम्बासी बस्तीमा फेला परेपछि स्थानीयले नियन्त्रणमा लिएर प्रहरीलाई बुझाएपछि प्रहरीले आफन्तलाई बुझाएको हो। 

मौन अवधिका बेला माया सुकुम्बासी बस्तीमा भेटिएपछि नेपाली कांग्रेसका कार्यकर्ताले मतदाता प्रभावित बनाउन आएको भन्दै न्दै नाराबाजी गरेका थिए। नाराबाजीका बेला माया वडा नं-११ मजुवाटोलस्थित सिर्जना भुसालको घरमा लुकेर बसेकी थिइन्। यसपछि जनपद र सशस्त्र प्रहरीको टोलीले उनलाई उद्धार गरेको थियो। 

एमाले र सत्ता गठबन्धनका प्रतिनिधिलाई राखेर भट्टराईलाई आफन्तको जिम्मा लगाइएको इलाका प्रहरी कार्यालय बुटवलका डिएसपी ठगबहादुर केसीले बताए। उनका अनुसार तीनजना महिला मजुवा पुगेपछि कांग्रेस कार्यकर्ताले प्रहरीलाई खबर गरेका थिए।