महिला भलिबलमा न्यु डायमन्ड र आर्मी पराजित, एभरेस्ट र एपीएफ विजयी

काठमाडौं- काठमाडौंमा जारी छैटौं एनभीए राष्ट्रिय महिला तथा पुरुष भलिबल क्लब च्याम्पियनसिपमा मंगलबार न्यु डायमन्ड क्लब र आर्मीको विभागिय त्रिभुवन आर्मी क्लब पराजित भएका छन्।

मंगलबार बिहान सम्पन्न आजको पहिलो खेलमा एभरेस्ट भलिबल क्लबले होङ्वाङ्जी न्यु डायमन्ड क्लबलाई ३-२ को सेटमा पराजित गरेको हो।

एभरेस्टले न्यु डायमन्डमाथि पहिले सेटमै २७-२५ को निकै प्रतिस्पर्धात्मक जित निकालेको थियो। तर उसले दोस्रो र तेस्रो सेट क्रमश: १३-२५ र २०-२५ ले गुमायो। अन्तिममा जित निकाल्नै पर्ने दुबै सेट चाहिँ एभरेस्टले गुमाएन। 

न्यु डायमन्डको २१ रहँदै एभरेस्टले २५ अंक बनाएर खेललाई २-२ को बराबर गरेको थियो।  र, अन्तिममा १५-१३ ले हराउँदै लिगमा २ अंक बटुलेको छ। हारका बाबजुद न्यु डायमन्डले एक अंक जोड्न सफल भयो।

त्यस्तै, अर्को खेलमा आर्मीलाई एपीएफले ३-१ को सेटमा हरायो। पहिलो सेटमा लगातार पछि परिरहेको अवस्थादेखि अन्तिममा अगाडि बढ्दै एपीएफले २७-२५ को संघर्षपूर्ण जित निकालेको थियो। दोस्रो सेट भने आर्मीले सहजै कब्जा गर्यो। त्यो सेटमा आर्मीले २५ अंक पूरा गर्दा एपीएफ १३ अंकमा समेटियो।

खेलको सुरुबातमा अगाडि रहे पनि आर्मीले २५-२१ को हार बेहोर्यो। २-१ ले अगाडि रहेको अबस्थामा एपीएफलाई एक जितको अवशक्ता थियो भने पछि परेको आर्मीलाई दुई जित चाहिएको थियो। चौथो सेटमा ९-९ बाट १५-१५ र १९-१९ को बराबरी हुँदै २५-२३ को सेटमा जित निकाल्यो।