डोल्पाका दुई गाउँपालिकामा नेकपा (एस) का अध्यक्ष निर्विरोध

काठमाडौं– हिमाली जिल्ला डोल्पामा दुईजना गाउँपालिका अध्यक्ष निर्विरोध निर्वाचित भएका छन्। नेकपा एकीकृत समाजवादीबाट उम्मेदवार रहेका काइके गाउँपालिका र छार्काताङसोङ गाउँपालिकामा अध्यक्ष निर्विरोध भएका हुन्।

दुई गाउँपालिकाका अध्यक्षमा र डोल्पोबुद्ध गाउँपालिका उपाध्यक्षमा एकीकृत समाजवादीबाट एकल उम्मेदवारी परेको थियो।

काइके गाउँपालिका अध्यक्षमा अंगतकुमार राना निर्विरोध भएका छन्। छार्काताङसोङ गाउँपालिका अध्यक्षमा सेनाङ गुरूङ निर्विरोध भए भने डोल्पोबुद्धको उपाध्यक्षमा पेमा वाङ्जु गुरूङ निर्विरोध भइन्।

अध्यक्ष निर्विरोध भएका राना र गुरूङले ०७४ को स्थानीय चुनावमा पनि अध्यक्ष जितेका थिए। उनीहरू हालै नेकपा एमाले छाडेर एकीकृत समाजवादीमा गएका हुन्।

साथै काइके ७ को वडाध्यक्षमा रामचन्द्र रोकाया, डोल्पोबुद्ध गाउँपालिका ४ का वडाध्यक्षमा लावाङ गुरुङ, डोल्पोबुद्ध गाउँपालिका ६ को वडा अध्यक्षमा नर्बु गुरुङ, छार्काताङसोङ ५ मा साङ्बो गुरुङ र छार्का ३ मा वाङ्जु गुरुङ वडाध्यक्षमा निर्विरोध भएका छन्।