भलिबल क्लब लिगमा हेल्प नेपाल र आर्मीको जित

काठमाडौं- छैटौं एनभीए राष्ट्रिय महिला तथा पुरुष क्लब भलिबल लिगको दोस्रो दिनको खेलमा टिप टप हेल्प नेपाल र विभागीय क्लब त्रिभुवन आर्मी क्लबले जित निकालेका छन्।

सात टिम सहभागी भएको पुरुषतर्फको खेलमा हेल्प नेपालले ढोरपाटन स्पोट्स क्लबलाई ३-० को सोझो सेटमा हराएको हो। टिप टप हेल्प नेपाल र ढोरपाटन स्पोट्स क्लबको खेलमा हेल्प नेपालले २५–२१, २७–२५ र २५–२० को सेटमा जित निकालेको हो।

त्यस्तै, अर्को खेलमा यस्तै पुरुषतर्फ पनि सेनाले जित निकाल्यो। सेनाले गण्डकी प्रदेश भलिबल क्लबलाई २५–१९, २५–८, २५–१८ ले जित निकाल्दै ६ अंकका साथ अग्रस्थानमा रहन सफल भयो। प्रतियोगिताको पहिलो दिन पनि सेनाले अर्को विभागिय टोली एपीएफलाई २५–२३, २५–१८, २५–२२ ले पराजित गर्दै ३ अंक जोडेको थियो।

लिगमा नेपाली सेनाको त्रिभुवन आर्मी क्लबको महिला तथा पुरुष दुवै टिमले सोमबार सफलता हात पारेका छन्। प्रतियोगिताको महिलातर्फ सेनाले एभरेष्ट भलिबल क्लब, रुपन्देहीमाथि २५–१९, २५–७, २५–१८ को जित निकालेको हो। यो जितसँगै आर्मीमो महिला टिमले आफ्नो खातामा तीन अंक जोड्न सफल भएको छ।

त्रिपुरेश्वरस्थित राखेपको कभर्डहलमा भएको प्रतियोगिताको महिलातर्फ विभागीय टोली पुलिस क्लबले अर्को विभागीय टोली एपीएफलाई २५–२०, २५–२३, १७–२५ र २५–१६ ले पराजित गर्दै ३ अंक जोड्न सफल भयो।