चुनाव चिन्हमा असन्तुष्टि जनाउँदै धर्नामा बसे मेयरका उम्मेदवार

काठमाडौं– जनकपुरमा एक उम्मेदवार निर्वाचन अधिकृतको कार्यालय अगाडि धर्ना बसेका छन्। जनकपुरधाम उपमहानगरपालिकामा मेयर पदका लागि स्वतन्त्र उम्मेदवार उठेका मनोज साह मुख्य निर्वाचन अधिकृत कार्यालयमा धर्ना बसेका हुन्।

नेपाली कांग्रेसका नेता साह पार्टीले टिकट नदिएपछि बागी उठेका थिए। निर्वाचन आयोगले आफूलाई प्रदान गरेको चुनाव चिन्ह नमुना मतपत्र र वेबसाइटमा नराखिएको भन्दै उनले विरोध गरेका हुन्।

आफूले यसबारे कुरा राख्दा सुनुवाइ नभएपछि धर्ना बस्नुपरेको साहको भनाइ छ। निर्वाचन आयोगले भने स्वतन्त्र उम्मेदवार धेरै भएका ठाउँमा पुनः मतपत्र छपाइ गर्ने तयारी गरेको छ। आयोगले अनुमान गरेभन्दा धेरै संख्यामा उम्मेदवारी परेपछि केही जिल्लाका स्थानीय तहमा फेरि मतपत्र छपाइ गर्नुपरेको हो।