सिरिजको पहिलो खेलमै 'जिम्बावे ए'सँग हार्‍यो नेपाल

काठमाडौं- नेपाली राष्ट्रिय क्रिकेट टिम र जिम्वाबे'ए'बीच भएको टी–२० सिरिजको पहिलो खेलमै नेपाल ६ विकेटले पराजित भएको छ। त्रिवि क्रिकेट मैदानमा भएको खेलमा टस हारेर ब्याटिङको निम्तो पाएको नेपालले पाहुना टिम जिम्वाबे 'ए'लाई १८२ रनको लक्ष्य प्रस्तुत गरेको थियो। जवाफमा जिम्बावे सात बल बाँकी रहँदै निर्धारित लक्ष्य पूरा गरेर नेपालविरुद्ध जित निकालेको हो।

जिम्बावेको जितमा ताडिवानासी मरुमानी र कप्तान टोनी मुन्योन्गाले सतक बनाएका थिए। करण केसीले आउट गराएका मरुमानीले ४१ बलमा ५६ रन बनाए भने टोनीले २३ बलमा ५० रन बनाएका छन्। टोनीलाई बसिर अहमदले कट एन्ड बोल्ड आउट गराएका थिए।

त्यस्तै, सन्दीप लामिछानेले आउट गराएका इनोसेन्ट काइयाले ३० बलमा ४७ रन बनाएका थिए। बसिरले दुई विकेट लिए भने सन्दिप र करण केसीले समान १–१ विकेट लिएका थिए।

त्यसअघि नेपालले पूरा ओभर खेल्दै ५ विकेट गुमाएर १८१ रन बनाएको थियो। नेपालका लागि कुशल भुर्तेलले४६ रन बनाए। त्यस्तै, युवा खेलाडी मोहम्मद आदिल आलमले २७ बलमा सर्वाधिक ४७ रनको योगदान दिएका थिए। जिम्वाबेलाई प्रतिस्पर्धात्मक  लक्ष्य प्रस्तुत गर्ने क्रममा नेपालका रोहित पौडेलले ३६ रन बनाए भने दिपेन्द्र सिंह ऐरीले २८ रनको योगदान दिए।

त्यस्तै, नेपालविरुद्ध बलिङ गरेका लुके जोन्वे, ब्राड इवान्स, ब्रान्डन मवुता र जोन मसारालले समान १–१ विकेट गिराएका थिए।

प्रतियोगिता शनिबारबाट सुरु हुने भनिए पनि वर्षाका कारण पहिलो दिनको खेल नै स्थगित भएको थियो। साथै यसपहिले एक दिवसीय प्रतियोगिता सुरुमा गर्ने तयारी गरिए पनि मौसमको परिवर्तका कारण पहिले टी–२० प्रतियोगिता आयोजना भएको हो।

नेपाल र जिम्बावेको सिरिज आजबाट सुरु भएको हो। तीन खेलको टी–२० र तीन खेलको एकदीवसिय शृंखला मे ९ सम्म चल्नेछ।