राष्ट्रिय खेलकुद : २७ खेलमा भाग लिँदै कर्णाली

काठमाडौं- गण्डकी प्रदेशमा हुने नवौं राष्ट्रिय खेलकुदमा कर्णाली प्रदेशले २७ खेलमा सहभागिता जनाउने भएको छ। खेलाडी, प्रशिक्षक र व्यवस्थापक गरी कर्णालीबाट ५ सय ६० जनाको सहभागिता रहने राष्ट्रिय खेलकुद परिषद् (राखेप)ले बताएको छ।

राष्ट्रिय खेलकुदको खेलाडी छनोट र बन्द प्रशिक्षणका लागि कर्णाली प्रदेश सरकारले कर्णाली प्रदेश खेलकुद परिषद्लाई १ करोड रुपैयाँ उपलब्ध गराउने भएको छ।

खेलाडीसहितको टोलीलाई आवश्यक पर्ने खेल सामाग्री, पोसाक र किट ब्याग खरिदका लागि सरकारले एक करोड सहयोग गर्ने भएको हो। त्यसका लागि सार्वजनिक सूचना समेत आह्वान भइसकेको छ।

बन्द प्रशिक्षण जेठ २ गतेबाट सुरु हुने छ। नवौं राष्ट्रिय खेलकुद जेठ २२ देखि २८ गतेसम्म हुनेछ।