सिटीको सानदार जित, अर्को खेलमा हार बेहोरेपछि नर्विच रेलिगेसनमा

काठमाडौं- शनिबार राति लिड्स युनाइटेडविरुद्ध ४–० को जित निकालेसँगै म्यानचेस्टर सिटीले प्रिमियर लिगको शीर्षस्थानमा दबदबा कायम राखेको छ। उपाधिको मुख्य दाबेदार सिटीले लगातार जित निकालेसँगै उसले उपाधि होड कायम राखेको हो।

लिड्सको मैदानमा सिटीलाई जित दिलाउन रोड्री, नाथन एक, ग्याब्रियल जिसस र फर्नान्डिन्होले गोल गरेका थिए। यो जितसँगै ८३ अंक बनाएको सिटी लिभरपुलभन्दा एक अंकले मात्र अघि छ।

गएरातिकै अर्को खेलमा एस्टन भिल्लासँग पराजित भएपछि नर्विच सिटी यो वर्ष ईपीएलबाट रेलिगेसनमा परेको छ। उसले अब अर्को वर्ष दोस्रो डिभिजनको च्याम्पियनसिप खेल्नेछ। अहिले तालिकाको पुछारमा रहेको नर्विचले ३४ खेलबाट २१ अंक बनाए पनि रेलिगेसन टार्न भने सकेन।

गएराति नर्विचविरुद्ध २–० गोलको जित निकालेको एस्टन भिल्लाकालागि भने ओल्ली वाटकिन्स र ड्यानी इंग्सले गोल गरेका थिए। भिल्ला ४० अंकका साथ १३औं स्थानमा छ।

गएरातिकै खेलमा ब्राइटोनले उल्भ्सलाई हराएको छ भने साउथह्याम्टनले क्रिस्टल प्यालेससँग हार बेहोरेको छ। यता लिभरपुलले न्युकासलाई हराएर लिगमा ८२ अंक पुर्‍याएको छ।