भरतपुरमा एमाले उम्मेदवारले भने- अटोलाई व्यवस्थित गर्छु

चितवन- भरतपुर महानगरपालिकाको नेकपा एमालेका मेयरका उम्मेदवार विजय सुवेदीले महानगरमा चल्ने तीन पांग्रे अटोलाई व्यवस्थित गर्ने बताएका छन्।

बिहीबार बिहान अटो व्यवसायीहरुसँगको छलफलका क्रममा सुवेदीले आफू मेयरमा निर्वाचित भएपछि भरतपुरमा नयाँ अटो थप्‍न नदिने र भएकालाई व्यवस्थित रुपमा सञ्चालनको व्यवस्था मिलाउने बताए।

 ‘नगर प्रमुखमा निर्वाचित भएपछि यहाँ  सीमित संख्यामा मात्रै अटो चलाउन मिल्ने गरी व्यवस्थित गर्छु’, उनले भने। 

सबै जनता कार चढ्न सक्ने अवस्थामा नभएको भन्दै भन्दै उनले अटोलाई नै व्यवस्थित रुपमा सञ्चालन गरिने बताए। 

व्यवसायीहरुले अटोमा लगाइँदै आएको कर न्युनिकरण गर्नुपर्ने, झन्झटिलो लाइसेन्स प्रक्रियालाई सहज बनाउनुपर्ने र महानगरको मुख्य सडकमा पनि अटो चलाउन पर्ने माग राखेका छन्। 

त्यस्तै, ट्राफिक प्रहरीले साना ठूला सबै सवारी साधनलाई एकै रुपमा जरिवाना लगाउने गरेको भन्दै व्यवसायीहरुले असन्तुष्टि जनाएका थिए।