जनकपुरधाम- जनकपुरधाम उपमहानगरपालिकाको नगरप्रमुखका लागि २१ जनाले उम्मेदवारी दर्ता गराएका छन्। उपप्रमुखमा १० जनाले उम्मेदवारी दर्ता गराएको निर्वाचन अधिकृतको कार्यालयले जानकारी दिएको छ।
आइतबार २ जना र सोमबार १९ जनाले नगरप्रमुख पदमा उम्मेदवारी दिएको मुख्य निर्वाचन अधिकृत ब्रजेश प्याकुरेलले जानकारी दिए। मेयरमा १० जनाले स्वतन्त्र उम्मेदवारी दर्ता गराएका छन् भने ४ जना स्वतन्त्र उम्मेदवार छन्।
जनकपुरधाम उपमहानगरपालिकाको नगरप्रमुख पदका लागि पार्टीले टिकट नदिँदा कांग्रेस, एमालेलगायत दलबाट स्वतन्त्र उम्मेदवारका रुपमा मनोनयन दर्ता गराएका छन्।
सत्तारूढ गठबन्धनका तर्फबाट मेयर पदका लागि लालकिशोर साह र उपमेयरमा किशोरी साहले मनोनयन दर्ता गराएका छन्।
लोकतान्त्रिक समाजवादी पार्टी नेपालबाट मेयरमा मनोज चौधरी र उपमेयरमा रिताकुमारी मिश्रले उम्मेदवारी दिएका छन्।
नेकपा एमालेको तर्फबाट मेयरमा शिवशंकर साह (हीरा) र उपमेयरमा कांग्रेस परित्याग गरी आज मात्रै एमालेमा प्रवेश गरेकी रुना झाले मनोनयन दर्ता गरेका हुन्।
नेपाल जनता पार्टीबाट मेयरमा मुरली मनोहर मिश्र र उपमेयरमा वन्दना पाण्डेले उम्मेदवारी दिएका छन्।
जनमत पार्टीबाट मेयरमा अनिता देवी साह र उपमेयरमा सन्तोष कुमार साहले मनोनयन दर्ता गराएका छन्।
तराई मधेश लोकतान्त्रिक पार्टीबाट विभा ठाकुरले मेयर र ईश्वर पण्डितले उपमेयरमा उम्मेदवारी दर्ता गराएका छन्।
जनकपुरधामको मेयर पदमै नेकपा मालेबाट गीता कुमारी मण्डलले उम्मेदवारी दिएकी छिन्।
मनोज साह, बलराम महतो, वैद्यनाथ साह, श्याम किशोर मण्डल, लक्ष्मण साह, रामसेवक यादव, बिक्की यादव, अनिल पंजियार र सुधीर कुमार महतोले मेयरका लागि उम्मेदवारी दर्ता गराएका छन्। केही दिनअघि मात्र एमालेमा प्रवेश गरेका जानकीराम साह एमालेबाट पनि टिकट नपाएपछि स्वतन्त्र उम्मेदवार बनेका छन्।
एमालेले उपप्रमुखमा टिकट नदिएपछि उमेश चौधरीले स्वतन्त्र रुपमा उपप्रमुख पदका लागि उम्मेदवारी दर्ता गराएका छन्।