बुटवलमा सत्ता गठबन्धनको सामना गर्दै बाबुराम भट्टराई

बुटवल– नेकपा एमालेले बुटवल उपमहानगरमा उम्मेदवारी दर्ता गरेको छ। सोमबार दिउँसो ३ बजे मेयरमा बाबुराम भट्टराई र उपप्रमुखमा सावित्रा अर्यालले उम्मेदवारी दर्ता गरेका हुन्। 

नेकपा एमालेका उपाध्यक्ष विष्णु पौडेलको उपस्थितिमा एमालेका उम्मेद्वारहरूले मनोनयन दर्ता गराएका हुन्। बुटवल पूर्व अर्थमन्त्री एवं एमाले उपाध्यक्ष पौडेलको गृहनगर पनि हो। 

मेयरका आकांक्षी गोपाल रानाले टिकट नपाएपछि पौडेल रुष्ट बनेको भन्दै समाचार सार्वजनिक भएको थियो। त्यसलाई चिर्न समेत पौडेल बुटवल आएर उम्मेद्वार जिताउन खटिएको नेताहरूले बताएका छन्। एमालेले बुटवलमा जनमुक्ति पार्टीसँग तालमेल गरेको छ।

एमालेले मेयर र उपमेयर सहित १९ वटै वडामा उम्मेदवारी दिएको छ। यो पटक एमालेलाई आफ्नो शाख जोगाउन चुनौति छ। पाँच दलीय गठबन्धनबाट मेयरमा खेलराज पाण्डेको उम्मेदवारी परेको छ। एमालेका उम्मेद्वार भट्टराई बुटवलमा व्यापारिक पृष्ठभूमिका हुन् भने उपमेयर उम्मेदवार अर्याल महिला अधिकारको क्षेत्रमा क्रियाशिल महिला हुन्। भट्टराई एमाले प्रदेश कमिटी सदस्य हुन् भने अर्याल पार्टी केन्द्रीय सदस्य।

राजनीतिक रुपमा भन्दा व्यावसायिक रुपमा परिचित नाम हो बाबुराम भट्टराई। उनी औषधी व्यवसायी हुन्। नेपाल औषधि व्यवसायी संघका पूर्वअध्यक्ष भट्टराईले एमालेको केन्द्रीय स्वास्थ्य विभागमा रहेर पनि काम गरेका थिए। स्याङ्जाको कालिगण्डकी गाउँपालिका वडा नम्बर ४ विर्घामा उनको जन्म भएको हो।

व्यवसायसँगै राजनीतिमा पनि भट्टराई भूमिगत कालदेखि नै जोडिएका पात्र हुन्। उनका अनुसार २०३२ सालदेखि नेपालको कम्युनिष्ट आन्दोलनमा उनी सरिक भएका छन्। भट्टराई उद्योगी, व्यवसायी, युवा, विद्यार्थी माझमा परिचित छन्। 

भूमिगत कालमा बुटवलमा भाडामा बस्दा नेताहरुसँग आउजाउ गर्दादेखि नै नेताहरुसँग संगत बाक्लिएको थियो उनको। २०४६ सालको जनआन्दोलनमा सक्रिय सहभागिता जनाएका भट्टराई २०६२–६३ सालको आन्दोलनमा आकस्मिक राहत कोषका संयोजक भएर चर्चा कमाएका थिए।

भट्टराई ३५ वर्षको उमरमै औषधि व्यवसायी संघको लुम्बिनी प्रदेश अध्यक्ष बनेका थिए। बुटवलमा २०७४ सालको निर्वाचनयता २४ हजारभन्दा बढी मतदाता थपिएका छन्। यसपटकको निर्वाचनमा बुटवलमा ९० हजार ६५ मतदाता छन्।