विराटनगर महानगरमा ३ मेयरसहित ५६ जनाले गराए उम्मेदवारी दर्ता

विराटनगर- आगामी वैशाख ३० गते हुने स्थानीय तह निर्वाचनका लागि मनोनयन दर्ताको पहिलो दिन विराटनगर महानगरपालिकामा तीन जनाले मेयर पदमा उम्मेदवारी दिएका छन्।  

मुख्य निर्वाचन अधिकृतको कार्यालयका अनुसार मेयर पदका लागि जनमत पार्टीबाट एक जना र दुई जनाले स्वतन्त्रबाट उम्मेदवारी दिएका हुन्। जनमत पार्टीबाट महानगर समिति अध्यक्ष अरुणकुमार मण्डलले मेयरका लागि उम्मेदवारी मनोनयन दर्ता गराएका हुन्। 

जसपा परित्याग गरेका उमेश यादवले स्वतन्त्रमा उम्मेदवारी दिएकाछन। विराटनगर वडा नम्बर २ का सकिय गौतमले पनि मेयरका लागि उम्मेदवारी मनोनयन दर्ता गराएका छन्।  

निर्वाचन अधिकृतको कार्यालयका सूचना अधिकारी हेम बुढाथोकीले पहिलोदिन मेयरसहित वडाध्यक्ष र सदस्यमा  ५६ जनाले मनोनयन दर्ता गराएको बताए। उनका अनुसार १८ जना वडा अध्यक्ष र ३५ जनाले वडा सदस्यमा मनोनयन दर्ता गराएका छन्। 

राजनीतिक दलतर्फ जनमत, विवेकशील साझा पार्टी, नेपाल सदभावना पार्टी, लोसपा, नागरिक उनमुक्ति पार्टी, पिछडा वर्ग, निसाफ जनजाति पार्टीले वडा अध्यक्षमा उम्मेदवारी दिएका छन्। ८ जनाले भने स्वतन्त्र उम्मेदवारी दर्ता गराएका छन्। वडा नम्बर १० मा माधवराज वाग्लेले स्वतन्त्रबाट वडाध्यक्षमा उम्मेदवारी दिएका छन्। वाग्ले ०७४ मा स्वतन्त्रबाट वडाध्यक्षमा निर्वाचित भएका थिए।