'मधेशी नेताकै कारण मधेश बर्बाद'

जनकपुरधाम- संघीय समाजवादी फोरमका अध्यक्ष तथा स्वास्थ्यमन्त्री उपेन्द्र यादवले मधेशी नेताले नै मधेश बर्बाद पारेको आरोप लगाएका छन्। मधेशी नेताहरुले बजेट सदुपयोग नगर्दा मधेश बर्बाद भएको उनको भनाइ छ।

बिहिबार जनकपुर पुगेका मन्त्री यादवले सञ्चारकर्मीहरुसँग कुराकानी गर्दै मधेशमा पर्याप्त बजेट आएपनि मधेशी नेताहरुले सदुपयोग नगरेकोले मधेश विकसित हुन नसकेको जिकिर गरे।

पहाडमा बजेट सदुपयोग भएपनि मधेशमा हुन नसकेको उनले बताए। मधेश केन्द्रित दलका मधेशी नेता मात्र नभइ अन्य दलका मधेशी नेताहरुले समेत बजेट सदुपयोग गर्न नसकेको यादवको भनाइ छ। उनले मधेशमा उपभोक्ता समिति गठन गरेर विकास नगरी कमिसन खाने परम्परा व्याप्त रहेकोले विकास अगाडी बढ्न नसकेको उल्लेख गरे।

जनकपुरलाई फोहोर शहर बताउँदै यादवले सरसफाईको लागि आएको बजेट नेताहरुले दुरुपयोग गरेको टिप्पणी गरे।