बुटवलमा गठबन्धनविरुद्ध जसपाद्वारा मेयर र उपमेयरमा उम्मेदवारी दर्ता

बुटवल- सत्ता गठबन्धनमा भएको सहमति विपरीत बुटवलमा जनता समाजवादी पार्टीले बुटवल उपमहानगरमा मेयर उपमेयरका लागि उम्मेदवारी दर्ता गरेको छ। 

बुटवलस्थित निर्वाचन कार्यालयमा आइतबार मेयरका लागि सुरज हितान मगर र उपमेयरमा सम्झना पौडेलले उम्मेदवारी दर्ता गराएका हुन्।

सत्ता गठबन्धनमा रहेको जसपाले बुटवल उपमहानगरमा आफ्नो पार्टीको अस्तित्व स्वीकार नगरेकाले बाध्य भएर उम्म्देवारी दिनुपरेको जनता समाजवादी पार्टीका केन्द्रीय सदस्य तथा लुम्बिनी प्रदेश सहइन्चार्ज कमल खनालले बताए। पहिलो दिन मेयर र उपमेयरको मनोनयन गरेको बताउँदै सोमबार १९ वटै वडामा मनोनयन गर्ने बुटवल नगर इन्चार्ज नारायण नागिलाले बताए।

बुटवल उपमहानगरमा सत्तारुढ पाँच दलका बीचमा केन्द्रीय तहबाटै गठबन्धन कायम गर्ने सहमती भएको हो। सहमती अनुसार बुटवलमा मेयर कांग्रेस र उपमेयर एकीकृत समाजवादीको भागमा परेको छ। 

तर, सत्ता गठबन्धनकै घटकले उम्मेदवारी मनोनयन गरेपछि गठबन्धन भत्किने क्रम सुरु भएको हो। जसपाबाट बुटवलको मेयरमा उम्मेदवारी दिएका हितानले आफूले युवाहरुको भावनालाई बुझेर काम गर्ने प्रतिबद्धता जनाएका छन्। पहिलो दिन रुपन्देहीका स्थानीय तहहरुमा साना दलले मात्रै मनोनयन दर्ता गरेका छन्।