रोल्पाको मेयरमा एमालेबाट उम्मेदवार बने पूर्वपत्रकार तथा मानव अधिकारकर्मी घनश्याम आचार्य

काठमाडौं– नेकपा एमाले रोल्पाले जिल्लाका सबै स्थानीय तहमा उम्मेदवारको टुंगो लगाएको छ। आइतबार बसेको एमाले लुम्बिनी प्रदेश कमिटीको बैठकले रोल्पा नगरपालिकाको मेयरमा घनश्याम आचार्यलाई अघि सारेको छ। 

आचार्य पूर्व पत्रकार तथा मानव अधिकारकर्मी हुन्। ०७४ को चुनावमा माओवादी नेता कृष्णबहादुर महराका ज्वाइँ पुरण क्षेत्रीले मेयर हात पारेका थिए। यसपटकको चुनावमा कांग्रेसले पनि गठबन्धनबाट बाहिरिने निर्णय गरिसकेको छ। 

नगरपालिकाको उपप्रमुखममा कृष्णीकुमारी गौतमलाई अघि सारिएको छ। यस्तै रुन्टीगढीको प्रमुखमा बालाराम बुढा तथा उपप्रमुखमा हस्तमाली बाठा, त्रिवेणी प्रमुखमा कर्ण बाठा तथा उपप्रमुखमा जानकी बुढा, माडी प्रमुखमा विजय घर्ती तथा उपप्रमुखमा अमृता कुमारी घर्तीलाई अघि सारिएको छ।

गंगादेवको प्रमुखमा रोशनकुमार वली र उपप्रमुखमा निर्मला कुमारी वली, परिवर्तनको प्रमुखमा गंगाराम बुढा तथा उपप्रमुखमा सपना रोक्का, सुनछहरी प्रमुखमा जयप्रकाश बुढा र उपप्रमु्खमा पूर्माला खत्री, लुंग्री प्रमुखमा विरबहादुर खत्री र उपप्रमुखमा जुकमति बस्नेत र सुनिलस्मृति प्रमुखमा खिमचन्द्र पुन तथा उपप्रमुखमा तारा सेनलाई अघि सारिएको छ। 

थवाङ गाउँपालिकाको प्रमुखमा रविन्द्र रोका र उपप्रमुखमा शान्ती घर्तीलाई उम्मेद्वार बनाउने टुंगो लागेको छ।