एमाले इलामको पार्टी कार्यालयमा असन्तुष्ट समूहको तालासहित सामूहिक राजीनामा

काठमाडौं–  नेकपा एमाले इलामको पार्टी कार्यालयमा नगर कमिटीले तालाबन्दी गरको छ। शनिबार साँझ पार्टीको उम्मेदवारीबारे असन्तुष्टि जनाउँदै कमिटीले पार्टी कार्यालयमा तालाबन्दी गरेको हो।

यसअघि शनिबार इलाम नगरपालिकाको मेयरमा नरेन्द्रनाथ भट्टराईको नाम एमालेले सिफारिस गरेका सूचनाहरु सामाजिक सञ्जालमा छाएका थिए। त्यसपछि कमिटीले ‘पार्टीको परामर्शविपरीत अमूक व्यक्ति’लाई मेयरमा सिफारिस गरेको भन्दै त्यसको विरोध गरेका हुन्।

नगर कमिटीका अध्यक्ष तिलक ठकुरीसहित २२ जनाले कार्यालयमा तालाबन्दी गरेर सामूहिक राजीनामा पनि दिएका छन्।

एमाले इलामको नगरक मिटीका साथै भातृ संगठन राष्ट्रिय युवा संघ नेपाल इलाम शाखाका अध्यक्ष चन्द्र पाठक, रिटर्नी फेडेरेशन नेपाल इलामका अध्यक्ष हेमन्त आचार्यले समेत राजीनामा दिएका हुन्।

एमालेबाट इलाम नगरपालिकाको मेयरका लागि भट्टराईसँगै धिरेन चेम्जोङ, कृष्ण श्रेष्ठ लगायतको नाम सिफारिस भएको थियो। तर सो निर्णयका विरोधकर्ताहरुले धिरेन चेम्जोङलाई सिफारिस गर्नुपर्ने माग गर्दै कार्यालयमा तालाबन्दी गरेका हुन्। त्यस्तै बन्दकर्ताहरुले जनाधार नभएको पार्टीलाई टिकट दिएको भन्ने आरोप पनि लगाएका छन्।