पोखराको उपमेयरमा मञ्जुको अनिच्छा, पार्टीले दिएको टिकट अस्वीकार

काठमाडौं– नेकपा एमालेकी केन्द्रीय सदस्य मञ्जुदेवी गुरुङले पार्टीले दिएको पोखरा महानगरपालिकाको उपमेयर पदको टिकट अस्वीकार गरेकी छन्।

शनिबार साँझ बसेको एमालेको सचिवालय बैठकले गुरुङलाई उपमेयर पदको उम्मेदवार बनाउने निर्णय गरेको थियो। तर, उनले पार्टीको निर्णय अस्वीकार गरेकी छन्। पार्टीले आफूलाई उपमेयर पदको उम्मेदवार बनाएकोमा उनले आश्चर्य समेत प्रकट गरेकी छिन्। 

आफू मेयर र उपमेयर कुनै पनि पदमा दाबेदार नरहेको र पार्टीले बिना सल्लाह टिकट दिने निर्णय गरेको उनको भनाइ छ। उपमेयरको पद आफूलाई स्वीकार्य नरहेको गुरुङको भनाइ छ।  ‘मैले न मेयरमा आकांक्षा राखेको छु न उपमेयरमा आकांक्षा राखेको छु। मलाई सोध्दै नसोधी र जानकारी नै नदिई किन मेरो नाम उपमेयरका लागि निर्णय गरियो? मेरा लागि यो स्वीकार्य छैन,’ उनले भनेकी छन्। मञ्जु पोखराको बहालवाला उपमेयर हुन्।

केन्द्रीय सदस्य र हालको महानगरको उपमेयरलाई तल राखेर मेयरमा प्रदेश सचिवालय सदस्यलाई अघि सारिएपछि पोखरामा एमाले नेता–कार्यकर्ता असन्तुष्ट छन्।

नेकपा एमालेले पोखरा महानगरको मेयरमा दीपक पौडेललाई उम्मेदवार बनाउने निर्णय गरेको छ।