दुई पक्षीय सिरिजका लागि नेपाली टिमको घोषणा

काठमाडौं- आगमी अप्रिलबाट त्रिवि क्रिकेट मैदानमा सुरु हुने दुई पक्षीय सिरिजका लागि नेपाली टिमको घोषणा भएको छ। 

नेपाली टिमका मुख्य प्रशिक्षक पुबुदु दाशानायकेले नेपाली टिमको घोषणा गरेको नेपाल क्रिकेट संघ (क्यान)ले जानकारी दिएको हो।

अब नेपालले अप्रिल ३० देखि मे ९ सम्म त्रिवि मैदानमा जिम्बाबे ए टिमविरुद्ध एकदिवसीय र टी २० शृंखला खेल्नेछ।

नेपाली टिममा अहिले पनि पूर्वकप्तान ज्ञानेन्द्र मल्ल समेटिएका छैनन्। पछिल्लो पटक नेपालले पपुवा न्युगिनीसँग एकदिवशीय शृंखला खेल्दा र नेपाल, मलेसिया पीएजीबीचको टी २० शृंखलामा पनि ज्ञानेन्द्र टिममा थिएनन्।

त्यस्तै, आउँदो सिरिजको बन्द प्रशिक्षणका लागि विनोद भण्डारीले भने निरन्तरता पाएका छन्। त्यस्तै, देव खनाल, सागर ढकाल, आदिल अन्सारी, सुनिल धमलालगायतका खेलाडी समेटिएका छन्।

नेपाली टिमको कप्तान सन्दीप लामिछाने रहने छन् भने अहिलेसम्म उपकप्तानको घोषणा गरिएको छैन। नेपाली टिममा दीपेन्द्रसिंह ऐरी, कुशल भुर्तेल, सोमपाल कामी, देव खनाल, किशोर महतो, अदिल अन्सारी, भीम सार्की, विनोद भण्डारी, करण केसी, आरिफ शेख, आसिफ सेख, रोहित पौडेल, सुसन भारी, पवन सरार्फ, अभिनाश बोहरा, बासिर अहमद, लोकेश बम, सागर ढकाल, विवेक यादव, साहब आलम, विक्रम सोब र सुनिल धमला छन्।