राष्ट्रिय कबड्डी प्रतियोगिताको उपाधि आर्मीलाई

काठमाडौं–  मुख्यमन्त्री कप राष्ट्रिय पुरुष कबड्डी प्रतियोगिताको उपाधि विभागीय टोली नेपाल आर्मी क्लबले जितेको छ। बुधबार धनगढीमा सम्पन्न फाईनलमा विभागीय प्रतिद्वन्दी नेपाल एपिएफ क्लबलाई हराउँदै आर्मीले उपाधि जितेको हो। 

देशकै सर्वाधिक धनराशीको मुख्यमन्त्री राष्ट्रिय पुरुष कबड्डी प्रतियोगिताको उपाधि भिडन्तमा आर्मीले एपिएफलाई ४०–१६ ले हरायो। कैलाली जिल्ला कबड्डी संघको आयोजनामा धनगढीमा भएको प्रतियोगिताको उपाधिसँगै आर्मीले नगद एक लाख ५० हजार पुरस्कार पाएको छ।

उपविजेता एफिएफले नगद ८० हजारमा चित्त बुझाएको छ। सेमीफाईनल पुगेका दुई टोली सुदूरपश्चिम प्रदेश र लुम्बीनी प्रदेशले तेस्रो स्थान प्राप्त गरेका छन्। दुबै टोलीले ४०–४० हजार रुपैयाँ प्राप्त गरेका छन्।

प्रतियोगिताको दोस्रो दिन मंगलबार लिग चरणका खेलहरु र सेमिफाईनल सम्पन्न भएका थिए। जहाँ पहिलो सेमिफाईनलमा नेपाल आर्मी क्लबले लुम्बिनी प्रदेशलाई ४५–१२ ले हराउँदै फाइनल पुगेको थियो। दोस्रो सेमिफाईनल खेलमा एपिएफ क्लबले सुदूरपश्चिमलाई ३७–३२ ले हराएर फाइनलमा आर्मीसँगको भेट पक्का गरेको थियो।