लेटाङ घटना : १० जना अभियुक्तलाई धरौटीमा छाड्न आदेश

विराटनगर– महिला प्रहरीको हत्या भएको घटनामा संलग्न भएको आरोपमा पक्राउ गरेर कर्तव्य ज्यान मुद्दा चलाइएका १० जनालाई जिल्ला अदालत मोरङले जनही ५० हजार रूपैयाँ धरौटी लिएर छाड्न आदेश दिएको छ। 

मोरङको मिक्लाजुङ गाउँपालिका–२ का २१ वर्षीय कान्छा भनिने कृष्ण विश्वकर्मा, लेटाङ नगरपालिका–५ का १९ वर्षीय डम्बर कार्की, २७ वर्षीय विशेक मगर, धनकुटा घर भइ लेटाङ–५ मा बस्दै आएका २० वर्षीय सन्तोष कुँवर, ३२ वर्षीय राजकुमार भनिने कुमारबहादुर खोक्रेल, २० वर्षीय समीर राई, १८ वर्षीय कपिल नेपाली, २५ वर्षीय मनकुमार महरा, २९ वर्षीय लेखबहादुर मगर र १९ वर्षीय अनिल विश्वकर्मालाई पक्राउ गरेर कर्तव्य ज्यान मुद्दा चलाइएको थियो। 

अदालतका सूचना अधिकारी हेमबहादुर बुढाथोकीका अनुसार न्यायाधीश शिशिरराज ढकालको इजलासले अभियुक्तहरुलाई धरौटीवापतको रकम लिएर छाड्न आज आदेश दिएको हो। लेटाङ ५ खेरुवामा गत चैत ६ गते महिला प्रहरी उर्मिला श्रेष्ठको हत्या गरेको आरोपमा १५ जनाविरुद्ध कर्तव्य ज्यान मुद्दा दर्ता गरिएको थियो। पक्राउ परेका अभियुक्तलाई तत्काल प्राप्त प्रमाणका आधारमा पछि ठहरे बमोजिम हुने गरी धरौटीमा छाड्ने आदेश भएको बुढाथोकीले बताए। आवश्यक परेर खोजेका बेला उपस्थित गराउने गरी नाबालकहरुलाई अभिभावकको जिम्मा लगाउन अदालतले आदेश दिएको हो। 

घटनामा पक्राउ परेकामध्ये साबालक रहेका ४४ जनाविरुद्ध भने जिल्ला प्रशासन कार्यालयमा अभद्र व्यवहारको मुद्दा चलाइएको थियो। मुद्दाका प्रतिवादीलाई प्रमुख जिल्ला अधिकारी काशीराज दाहालको इजलासले धरौटीमा छाड्न आदेश दिएको प्रशासन कार्यालयका नायब सुब्बा रमेशकुमार निरौलाले बताए। लेटाङ ५ को शिक्षा विकास माध्यमिक विद्यालयका शिक्षक ५६ वर्षीय मनोजकुमार पौडेलले गत चैत ४ गते सोही विद्यालयमा अध्ययनरत १४ वर्षीया छात्रालाई यौन दुर्व्यवहार गरेको घटना बाहिरिएको थियो।

घटनाको विरोधमा सुरु भएको आन्दोलन हिंसात्मक झडपमा परिणत हुँदा चैत ६ गते महिला प्रहरी जवान २६ वर्षीया उर्मिला श्रेष्ठको हत्या भयो। शिक्षक पौडेललाई पुर्पक्षका लागि थुनामा राख्न जिल्ला अदालतले सोमबार साँझ आदेश दिएको थियो। 

लेटाङ घटनामा संलग्न भएको आरोपमा हालसम्म ७२ जनालाई प्रहरीले पक्राउ गरिसकेको छ। पक्राउ परेकामध्ये १५ जनाविरुद्ध अदालतमा कर्तव्य ज्यान मुद्दा दर्ता गरिएको थियो। मुद्दा दर्ता गरिएकामध्ये १० जनामात्रै पक्राउ परेका थिए।