नयाँबस्ती क्लबलाई तीन लाख जरिवाना, व्यवस्थापक र खेलाडीलाई प्रतिबन्ध

काठमाडौं- शहीद स्मारक 'बी' डिभिजन लिग खेल्ने नयाँबस्ति क्लबलाई अखिल नेपाल फुटबल संघ (एन्फा)ले तीन लाख जरिवाना गरेको छ।

भर्खरै सम्पन्न भएको बी डिभिजन लिगअन्तर्गत मध्यपुर युवा क्लबसँग पराजित भएपछि अभद्र व्यवहार साथै अनुशासन गतिविधि गरेका भन्दै तीन लाख जरिवाना गरिएको एन्फाले जनाएको छ।

'एन्फा कम्प्लेक्समा गत चैत ४ गते भएको एन्फा लिग समितिको बैठकले क्लबलाई जरिवाना गर्ने र क्लबका अधिकृत श्रीबहादुर योगीलाई एन्फाले सञ्चालन गर्ने फुटबल गतिविधिमा दुई वर्ष प्रतिबन्ध लगाउने निर्णय गरेको थियो,' एन्फाले सूचनामा लेखेको छ, 'क्लबका व्यवस्थापक विकास राईलाई ६ महिना र खेलाडी मनोज राईलाई एक वर्षको प्रतिबन्ध लगाइएको छ।'

अप्रिल ९ मा भएको खेलमा ३-१ ले पराजित भएपछि क्लबका खेलाडी तथा पदाधिकारीले एन्फा कम्प्लेक्समा म्याच अफिसियललाई गाली गर्नुका साथै भौतिक सम्पतिमा तोडफोड गरेका थिए। 

उनीहरुले एन्फा कम्प्लेस्को प्लेयर बस्को कुर्सी र ठाउमा तोडोफेड गरेका थिए भने मैदानमासमेत क्षति पुग्ने काग गरेका थिए। भर्खरै सम्पन्न लिगमा नयाँबस्ती तालिकाको ११औं स्थानमा रहेको थियो।