विराटनगरमा भएको आगलागीमा एक करोडको क्षति

विराटनगर- विराटनगर ९ मा रहेका पसल र होटलमा सोमबार राति आगलागी हुँदा एक करोडभन्दा बढीको क्षति भएको छ।
आगोले दुईवटा होटल, एउटा कपडा र एउटा किराना एवं भाँडा पसल ध्वस्त बनाएको छ। आगो नियन्त्रणमा खटिएका दमकलका तीन जना कर्मचारी घाइते भएका छन्।

विराटनगर महानगरपालिका–९ मा शोभादेवी घिमिरेको जग्गामा टिनको छानो लगाएर बनाइएको घरमा सञ्चालन गरिएका होटल तथा पसलहरुमा पूर्ण रूपले क्षति पुर्याएको मोरङ प्रहरीका प्रवक्ता डिएसपी दीपक श्रेष्ठले बताए। घर पूर्ण रूपमा ध्वस्त हुँदा ४० लाखभन्दा बढीको क्षति भएको अनुमान गरिएको छ।

शोभादेवीका छोरा कुमारप्रसाद घिमिरेले सञ्चालन गरेको किराना पसल, विराटनगर–८ का छविलाल उप्रेतीको कपडा तथा भाँडा पसल, विराटनगर–७ का विनोद राजवंशीले सञ्चालन गरेको न्यू राजवंशी होटल र विराटनगर–८ का दीपनारायण राजवंशीले सञ्चालन गरेको दिपेश होटल आगोले ध्वस्त बनाएको छ।

प्रहरीका अनुसार दमकलबाट पानी हालेर आगो निभाउने क्रममा कर्मचारीहरु विराटनगर–४ का ३७ वर्षीय भीम विष्ट, विराटनगर–२ का ३७ वर्षीय अशेष दाहाल र सुनसरी दुहवी–१२ का १९ वर्षीय प्रेमकुमार राजवंशी घाइते भएका छन्। आगलागीको कारण खुल्न सकेको छैन। राति १२ः१५ बजेतिर सुरु भएको आगो दमकल, स्थानीय र प्रहरीको सक्रियतामा डेढ घण्टापछि नियन्त्रणमा लिइएको प्रहरीले जनाएको छ ।