कलंकीको ‘अन्डर पास’ तयार, तर तत्काल नचल्ने

काठमाडौं- कलंकीको अन्डर पास मंसिरभित्र सञ्चालनमा आउने भएको छ । अन्डरपास निर्माणको अधिकांश काम सकिए पनि कलंकी-कोटेश्वर सडक विस्तार सकेर मात्रै उक्त अन्डर पास खुला गर्ने सरकारी तयारी छ । 

आयोजनाका इन्जिनियर निरञ्जन अर्याल शर्माका अनुसार अन्डरपास निर्माण ९९ प्रतिशत सकिएको छ । फिनिसिङको केही काम बाँकी रहेको उनले जानकारी दिए । 

'जुलाई २०१८ अगावै सक्ने लक्ष्य थियो । भूकम्प र नाकाबन्दीका साथै बिजुली, खानेपानी, टेलिफोनलगायतको तार र पाइप व्यवस्थापनका कारण ढिलाइ भयो,' शर्माले भने, 'सञ्चालनमा ल्याउन थप पाँच महिना धकेलिएको छ । सबै काम १५ डिसेम्बरसम्ममा सिध्याउने र अन्डर पास खुला गर्ने योजना छ ।'

उनका अनुसार लक्षित समयमा आयोजना नसकिने भएपछि ठेकेदार कम्पनीले थप पाँच महिनाको अवधि मागेको थियो । सोहीअनुसार सडक विभागले समय थपेको हो । 

कलंकी-कोटेश्वर सडक विस्तारअन्तर्गत् अन्डरपास निर्माण भएको हो । समग्र परियोजना डिसेम्बर २०१२ र अन्डरपास सन् २०१६ मा निर्माण थालिएको थियो । कलंकी-कोटेश्वरमा चार लेनको प्रमुख सडकसहित दुईतर्फ २/२ लेनका सर्भिस र साइकल ट्रयाक निर्माणाधीन रहेको इन्जिनियर शर्माले जानकारी दिए ।
 

चीनको अनुदान सहयोग र चिनियाँ कम्पनी 'दी थर्ड रेल्वे एन्ड डिजाइन इन्स्टिच्युट ग्रुप कर्पोरेसन'को डिजाइनअनुसार उक्त 'अन्डरपास' चिनियाँ कम्पनी सांघाई कन्स्ट्रक्सनले निर्माण गरेको हो । नेपालकै पहिलो अन्डरपास सुरुङको लम्बाइ आठ सय मिटर छ । 

अन्डरपास बनेपछि बल्खुबाट स्वयम्भु जाने गाडी सोही अन्डरपासबाट जानेछन् भने थानकोटबाट काठमाडौं भित्रिने गाडी अन्डरपास माथिबाट गुड्नेछन् । यसबाट कलंकीको जाम हट्ने अपेक्षा गरिएको छ । 

यस्तै, कलंकी-कोटेश्वर चक्रपथ विस्तार आयोजनाअन्तर्गत् निर्माणाधीन सडकखण्ड औसत ३८ दशमलव पाँच मिटर फराकिलो तथा १० दशमलव चार किलोमिटर लम्बाइको छ । सडक विस्तार पनि अन्तिम चरणमा पुगेको छ । 'हालसम्म ९५ प्रतिशत काम सकिएको छ,' इन्जिनियर शर्माले भने ।

उनका अनुसार बल्खुदेखि कोटेश्वरसम्मको आठ दशमलव ६ किमि खण्डमा एक तहको कालोपत्रे, फिनिसिङ, फुटपाथ र ट्राफिक लाइटहरूलगायत काम भइरहेको छ । 

बल्खुदेखि कलंकीसम्मको एक दशमलव चार किमि सडकमा 'रिटेनिङ', 'ड्रेन', 'पाइप कल्भर्ट'लगायत तयार भइसकेका छन् । कालोपत्रे भने बाँकी छ । सोही योजनाअन्तर्गत्को कलंकीबाट सीतापाइला जोड्ने सडकको पुल निर्माणाधीन छ । परियोजनाको कुल लागत पाँच अर्ब रुपैयाँ छ ।