हुम्लामा नहुने भो चुनावी तालमेल

काठमाडौं– सत्तारुढ गठबन्धन हुम्लामा पनि भत्किएको छ। स्थानीय तहको नेतृत्वका लागि भागबन्डा नमिलेपछि त्यहाँ सत्तारुढ दलहरुले स्वस्थ प्रतिस्पर्धा गर्ने सहमति गरेका छन्।

सोमबार नेपाली कांग्रेस, नेकपा माओवादी केन्द्र र नेकपा एकीकृत समाजवादीका नेताहरुले छुट्टाछुट्टै तर स्वस्थ प्रतिस्पर्धा गर्ने सहमति गरेका हुन्।

सातवटा स्थानीय तह रहेको हुम्लामा ०७४ सालको निर्वाचनमा माओवादीले चार पालिकाको अध्यक्ष, एक उपप्रमुख र १८ वडाध्यक्षसहित एक सय पदमा जितेको थियो। कांग्रेसले दुई गाउँपालिका प्रमुख, एक उपप्रमुख ११ वडाध्यक्षसहित ७६ पदमा जित्दा एमालेले एक पालिकाको अध्यक्ष, तीन उपाध्यक्ष र १० वडाध्यक्षसहित ५० पद हात पारेको थियो।

उता कास्कीको पोखरा महानगरपालिकामा नेपाली कांग्रेसले नेकपा ९एकीकृत समाजवादी० बाहेकका दलसँग तालमेल गर्ने निर्णय गरेको छ। पटक–पटकको छलफलपछि पनि एकीकृत समाजवादी सहमतिमा नआएको भन्दै कांग्रेसले अन्य दलसँग गठबन्धन गर्ने निर्णय गरेको कास्की कांग्रेसले जनाएको छ।  

‘जिल्ला संयन्त्रबाट निर्वाचनका लागि तालमेल गर्ने सम्बन्धनमा नेकपा एकीकृत समाजवादीसँग कास्की जिल्लामा व्यापक छलफल हुँदा एकीकृत समाजवादीको अस्वाभाविक दाबीका कारण निष्कर्ष निस्कन नसकेको र पार्टीका मातहतका निकायको राय सुझावलाई समेत मध्यनजर गरी अन्य गठबन्धनका दलहरुसँग तालमेलका लागि वार्ता संवाद अगाडि बढाउने र एकीकृत समाजवादीसँग स्थानीय निर्वाचनमा मैत्रीपूर्ण, स्वच्छ प्रतिस्पर्धासहित जाने निर्णय गरियो,’ कांग्रेसले सोमबार जारी गरेको विज्ञप्तिमा भनिएको छ। 

एकीकृत समाजवादीले पोखरा महानगरपालिका आफूले पाउनुपर्ने दाबी गरेको छ भने कांग्रेस कुनै हालतमा पनि आफैं राख्नुपर्ने पक्षमा छ।