सेनाका जम्दार सरकारी नक्कली कागजातसहित पक्राउ

धनगढी- सरकारी निकाय र विद्यालयको नक्कली कागजात तयार गर्ने गरेको अभियोगमा सेनाका अवकाश प्राप्त जम्दार पक्राउ परेका छन् ।
 
धनगढी-३ मिलनचोकमा विकास सेक्यूरिटी सर्भिसेज प्रालि खोलेर बसेका कञ्चनपुरको पुर्नवास नगरपालिका–५ का ४६ बर्षीय धनबहादुर गुरुङलाई प्रहरीले बुधबार उनकै कार्यालयबाट नियन्त्रणमा लिएको हो । सुरक्षाकर्मीकै नक्कली कागजात तयार पार्ने गरेको सुचनाका आधारमा प्रहरीले उक्त कार्यलयमा छापा मारेको थियाे । 

पक्राउ परेका गुरुङ १९ बर्ष नेपाली सेनामा जागिर गरेर जम्दार पदबाट सेवानिवृत भएको खुलेको छ । प्रहरीले उनको कार्यालयबाट तीन वटै सुरक्षा निकाय, एउटा नगरपालिका तथा दुई वटा विद्यालयको नक्कली छाप र कागजात बरामद गरेको छ । 

नेपाली सेनाको जंगी अड्डा, नेपाल प्रहरीको प्रधान कार्यालय तथा सशस्त्र प्रहरीको मुख्यालयको नक्कली छाप र कागजात भेटिएको प्रहरीले जनाएको छ । यस्तै कैलाली, कञ्चनपुर र सुर्खेत गरी तीन जिल्लाका जिल्ला प्रहरी कार्यालयको नक्कली छाप र लेटरप्याड पनि बरामद गरिएको छ । 

यसको साथै पुर्नवास नगरपालिका कार्यालयको नक्कली छाप पनि भेटिएको छ । मालिमा उच्च मावि सुर्खेत तथा गौरीशंकर मावि धनगढी नामको छाप पनि प्रहरीले उनीबाट बरामद गरेको छ । वडा प्रहरी कार्यालय धनगढीका इन्चार्ज प्रहरी निरीक्षक वकिलबहादुर सिंहको नेतृत्वमा गएको प्रहरीको टोलीले कार्यालयमा छापामारेको हो । 

गुरुङले भारतका बिभिन्न ठाउँमा सेक्यूरिटी गार्ड पठाउने र उनीहरुलाई चाहिने नक्कली पुलिस रिर्पाेट तयार पार्ने गरेको बुझिएको छ । सेक्यूरिटी गार्ड तयार पार्नका लागि सुरक्षाकर्मीका भुपुहरु भए ४० हजार तथा सर्वसाधारणका लागि भने ३० हजार शुल्क लिने गरेका थिए । उनले नै नक्कली पुलिस रिर्पोट बनाएर भारतमा सेक्यूरिटी गार्डको काममा पठाएका नेपाल प्रहरीका एक भूपु कर्मचारी पुलिस रिर्पोट अस्वीकृत भएर फर्किएपछि गुरुङको उक्त धन्दाको पर्दाफास भएको हो । 

कम्यूटर, प्रिन्टरसहित उनीसँग भएका सबै सामान प्रहरीले नियन्त्रणमा लिएर अनुसन्धान थालेको जिल्ला प्रहरी कार्यालयका प्रवक्ता प्रहरी नायव उपरीक्षक हरीवहादुर ओलीले जानकारी दिए ।