मेस्सीलाई पीएसजीमा गोलको खडेरी

काठमाडौं– अर्जेन्टिनी कप्तान तथा फ्रेन्च क्लब पीएसजीका स्टार स्ट्राइकर लियोनेल मेस्सी आफ्नो करिअरकै खराब स्थितिमा आइपुगेका छन्।

गत सिजन मात्र बार्सिलोना छाडेर पीएसजी गएका मेस्सीले त्यहाँ सोचे अनुरुपको खेल प्रस्तुत गर्न सकिरहेका छैनन्। दुई वर्षका लागि पीएसजी गएका उनको पहिलो सिजन सकिनै लाग्दा समेत उनले क्लबका लागि १० गोल समेत गर्न सकेका छैनन्। 

यो सिजन मेस्सीले पीएसजीका लागि लिगमा २१ खेल खेल्दा ३ गोल मात्र गरेका छन् भने च्याम्पियन्स लिगमा ७ खेलमा ५ गोल गरेका छन्। यो सिजन मेस्सीले लिगमा १३ असिस्ट गरेका छन्। मेस्सी यस्तो खराब स्थितिमा आएको यो पहिलो पटक हो।

विगतमा मेस्सीले प्रत्येक सिजन औसतमा ३०–४० गोलको आँकडा पूरा गर्ने गरेका थिए। अघिल्लो सिजन बार्सिलोनामा उनले ३० गोल भन्दा बढी गरेका थिए। लिगमा धेरै अवसरहरु सिर्जना गरे पनि उनी गोल गर्न भने असफल नै रहेका छन्।