लिग वानमा मेस्सीको टिम पीएसजी मार्सेसँग भिड्दै

काठमाडौं– फ्रेन्च लिग वानमा आज घरेलु टोली पीएसजीले मार्सेसँग खेल्दैछ। खेल पीएसजीको मैदान पार्क डे फ्रान्समा नेपाली समयअनुसार राति साढे १२ बजे सुरु हुनेछ।

लिगका शीर्ष दुई टिमबीचको आजको खेललाई निकै महत्वका साथ हेरिएको छ। तालिकामा पीएसजी शीर्ष स्थानमा छ भने मार्से दोस्रो स्थानमा रहेको छ। दोस्रो स्थानको मार्से भन्दा पीएसजी १२ अंकले अगाडि रहेको छ। त्यसैले आजको खेलको नतिजाले उसलाई खासै प्रभाव भने पार्नेछैन। त्यसैले पीएसजी आज दबाबमा हुनेछैन।

तर अब बाँकी ३ खेल जित्यो भने पीएसजीले यो लिगको उपाधि जित्ने छ। त्यसैले बाँकी खेल पनि जितेर उपाधि भित्र्याउने दाउमा छ। पीएसजीको खातामा ३१ खेलबाट ७१ अंक छ भने मार्सेको खातामा ५९ अंक छ। दुवै टिमले समान खेल खेलेका छन्। बाँकी सबै प्रतियोगिताबाट बाहिरिसकेको पीएसजीले जित्न सक्ने यो नै एउटा मात्र उपाधि हो। 

आजको खेल मार्सेका समर्थकले रंगशालाभित्र पसेर हेर्न पाउनेछैनन्। लिग वानमा धेरै समर्थकले हिंसा भड्काएको र खेल नै अवरुद्ध गर्ने खालका गतिविधि गरेका कारण यस्तो प्रतिबन्ध लगाइएको हो।