'प्रदेश १ का स्थानीय तहमा माओवादीसँग पनि तालेमल हुनसक्छ'

विराटनगर- नेकपा एमालेका स्थायी कमिटी सदस्य हिक्मतकुमार कार्कीले स्थानीय निर्वाचनका लागि पालिका तथा वडाहरु एमाले र माओवादीबीच पनि तालमेल हुन सक्ने बताएका छन्। 

केन्द्रले स्थानीय तहको जिम्मेवारी स्थानीय तहलाई नै दिएको हुँदा नेकपा माओवादीसँग वडा र पालिकामा तालमेलको सम्भावना रहेको नेता कार्कीको भनाई छ।

शुक्रबार विराटनगरमा पत्रकारसँगको भेटघाटमा नेता कार्कीले पार्टी गठबन्धनको पक्षमा नरहेपनि केन्द्र तहमा राप्रपा नेपालसँगको तालमेललाई स्वभाविक रुपमा लिनुपर्ने बताए। राजतन्त्र त्यागेर गणतन्त्रलाई आत्मसात गरेको राप्रपा नेपालको केही उम्मेदवारलाई एमालेले निर्वाचनमा स्थान दिने उनको भनाई छ। 

प्रदेश १ का पूर्वमन्त्री समेत रहेका नेता कार्कीले प्रदेश सरकार पूर्णरुपमा असफल भएको दाबी गरे। प्रदेश सरकारको संरचनाबारे जनतामा देखिएको नकारात्मक सोच र भावनालाई अहिलेको सरकारले थप बल पुर्‍याएको उनको आरोप छ। उनले भने, ‘बजेटविहीन अनावश्यक मन्त्रालय थप, कर्मचारीबिहीन मन्त्री थप, थपेर जनतामाझ सरकार आलोचित बन्यो।’