आदिवासी जनजाति राष्ट्रिय पत्रकारिता पुरस्कारबाट चार पत्रकार पुरस्कृत हुने

काठमाडौं- नेपाल आदिवासी जनजाति पत्रकार महासंघ (फोनिज) ले ‘आदिवासी जनजाति राष्ट्रिय पत्रकारिता पुरस्कार-२०७५’ बाट पुरस्कृत हुने चार पत्रकारको नाम सार्वजनिक गरेको छ।

पुरस्कार छनौट समितिको सोमबार बसेको बैठकले गरेको पुरस्कार छनौट सम्बन्धी निर्णय मंगलबार बसेको फोनिज सचिवालय बैठकले अनुमोदन गर्दै पुरस्कृत पत्रकारको नाम सार्वजनिक गरेको हो। 

फोनिजले हरेकवर्ष प्रदान गर्दै आएको सो पुरस्कार यस वर्ष पत्रकारहरु उजिर मगर (अनलाईन), भैरव आङ्ला (टेलिभिजन), छेटु शेर्पा (छापा) र बिमला चौधरी (रेडियो) विधामा पुरस्कृत गर्ने फोनिजका सचिव मिलन लिम्बूले जानकारी दिए।  

छनौटमा परेका पत्रकारहरुले जनही चालिस हजार हरुपैयाँ राशीको पुरस्कार प्राप्त गर्ने भएका छन्। उक्त पुरस्कार  साउन २७ गते फोनिजको स्थापना दिवसको अवसरमा आयोजना गरिने ‘१९औं स्थापना दिवस तथा पुरस्कार वितरण समारोह-२०७५’ कार्यक्रममा प्रदान गरिने भएको छ।

फोनिजको अनुसार उजिर मगरले २०५२ सालमा हाँक साप्ताहिकबाट पत्रकारीता सुरुवात गरेका हुन्। 
त्यस्तै भैरव आङ्लाले २०५६ सालमा मिराक साप्ताहिकबाट पत्रकारीता सुरु गरेका हुन् । छेटु शेर्पा र बिमला चौधरीले क्रमशः २०६३ र २०६२ सालदेखि पत्रकारीता सुरु गरेका थिए।