कर्णाली विकास गर्ने मुख्यमन्त्रीको ६ ‘ब’ अवधारणा

काठमाडौं-  मुख्यमन्त्री जीवनबहादुर शाहीले कर्णालीको समृद्धि र विकासका लागि प्रदेश सरकार ६ ‘ब’ को अवधारणाअनुसार अघि बढेको बताएका छन्। नयाँ वर्ष २०७९ का अवसरमा दिएको शुभकामना सन्देशमा उनले कर्णालीको विकासका लागि छ ‘ब’ आवश्यक रहेको उल्लेख गरेका हुन्।

६ 'ब'मा बाटो, विद्युत्, विचार, वन, बजार र व्यवस्थापनलाई राखिएको छ। मुख्यमन्त्री शाहीले विसं २०७८ मा कोरोना भाइरस महामारीका कारण प्रदेशको विकासमा लक्ष्यअनुसार प्रगति हुन नसकेको उल्लेख गरे। यद्यपि प्रदेश सरकारले स्थानीय तह र सङ्घीय सरकारसँग समन्वय गरेर महत्वपूर्ण कामको सुरुआत गरेको उनको भनाइ छ।

'सडक पूर्वाधारबिना कर्णालीमा विकास र समृद्धि सम्भव छैन, प्रदेश सरकारले राजधानी वीरेन्द्रनगरको पूर्वाधार निर्माणसँगै कर्णाली करिडोरको स्तरोन्नतिमा पहल गरिरहेको छ। ‘चुल्होको सरकार’ स्थानीय तह, ‘देखिने सरकार’ प्रदेश सरकार र ‘सुनिने सरकार’ सङ्घीय सरकारबीचको समन्वय, सहकार्य र सहअस्तित्वलाई कर्णाली प्रदेश सरकारले महत्व दिएको छ,' मुख्यमन्त्रीको शुभकामनामा उल्लेख छ।

सन्देशमा मुख्यमन्त्री शाहीले नयाँ वर्षको शुभारम्भसँगै सबैले समयको महत्व बुझेर प्रदेशको विकासमा योगदान गर्न पनि आग्रह गरेका छन्।