रुपन्देहीमा एमाले : तिलोत्तमामा ४ र सिद्धार्थनगरबाट ८ जनाको नाम मेयरका लागि सिफारिस

बुटवल- नेकपा एमालेले रुपन्देहीको तिलोत्तमाको मेयर पदका लागि चार जनाको नाम सिफारिस गरेको छ भने सिद्धार्थनगरबाट आठ जनाको नाम सिफारिस गरिएको छ। एमाले तिलोत्तमा नगर कमिटीको बैठकले मेयरमा बहालवाला मेयर वासुदेव घिमिरे, नेताहरू मोहन चापागाई, यज्ञ गैरे र दिनेश फुल्लेलको नाम सिफारिस भएको एमाले तिलोत्तमा नगर कमिटी अध्यक्ष तामनाथ पाण्डेले जानकारी दिए ।

यता बैठकले उपप्रमुख उपमेयरका लागि ५ जनाको नाम सिफारिस गरेको छ। बहालवाला उपमेयर जागेश्वरदेवी चौधरी, नेतृहरू देवी वाग्ले, रेनुका खरेल, जमुना लम्साल र संगिता गुरूङको नाम उपमेयरको लागि सिफरिस गरेका हुन्।

गृहमन्त्री खाणको गृहनगर भएकोले पनि तिलोत्तमाको निर्वाचनलाई निकै चासोको साथले हेरिएको छ।  

सिद्धार्थनगरबाट ८ सिफारिस

एमालेले रूपन्देहीको सिद्धार्थनगर नगरपालिकाबाट ८ जनाको नाम जिल्ला कमिटीलाई सिफारिस गरेको छ। आकांक्षी ८ जनाको नाम जिल्ला कमिटीमा सिफारिस गरिएको नगर सचिव नारायणप्रसाद भण्डारीले बताए। बहालवाला मेयर हरि अधिकारी सहित ८ जनाको नाम सिफारिस भएको छ। त्यस्तै  मेयरमा सिफारिस हुनेहरुमा भरत पोखरेल, नारायण प्रसाद भण्डारी, हितराज पन्थी, डा. रामप्रसाद बस्याल, राजेन्द्र पन्थी, जीवलाल अर्याल, अर्जुन गिरी छन्।

उपमेयरमा उमा अधिकारी, सीता काफ्ले र पम्फावती खनालको नाम सिफारिस गरिएको छ। सिद्धार्थनगरकी उपमेयर एमालेबाट निर्वाचित भए पनि हाल नेकपा एकीकृत समाजवादी पार्टीमा लागेकी छन्। रुपन्देही क्षेत्र नम्बर ३ मा पर्ने सिद्धार्थनगर एमाले नेता घनश्याम भूसालको निर्वाचन क्षेत्रमा पर्छ। तर, यो पटक भूसालको सक्रियता भने कमजोर देखिएको छ। बहालवाला मेयर अधिकारी भुसाल निकट हुन्।