कर्णालीमा स्थानीय चुनाव लड्ने संख्या अन्य प्रदेशको तुलनामा न्यून

कर्णाली- कर्णाली प्रदेशबाट निर्वाचनमा भाग लिने दलको संख्या अन्य प्रदेशको तुलनामा न्यून देखिएको छ। कर्णालीका १० जिल्लामध्ये सुर्खेतमा सबैभन्दा बढी र डोल्पामा सबैभन्दा कम दलले निर्वाचनमा भाग लिँदैछन्। 

सुर्खेतमा विभिन्न २५ दल र डोल्पामा राष्ट्रिय मान्यता प्राप्त ६ सहित ११ दलले प्रतिस्पर्धा गर्ने भएका हुन्। सुर्खेतमा ६ राष्ट्रिय मान्यता प्राप्त दल र १९ साना दल गरी २५ दलले निर्वाचनमा भाग लिने भएको निर्वाचन आयोगको प्रदेश कार्यालयले जनाएको छ। 

राष्ट्रिय मान्यता प्राप्त नेकपा एमाले, नेपाली कांग्रेस, नेकपा माओवादी केन्द्र, नेकपा एकीकृत समाजवादी र लोकतान्त्रिक समाजवादी पार्टी (लोसपा) नेपालसहित दलले निर्वाचनमा भाग लिने भएका हुन्। अघिल्लो निर्वाचनमा स्वतन्त्रबाट ५ जनासहित नेपाली कांग्रेस, नेकपा एमाले, माओवादी केन्द्र र राष्ट्रिय जनमोर्चाका उम्मेदवारले मात्र चुनाव जितेका कार्यालयले जनाएको छ। 

कर्णालीका अन्य जिल्लामा रुकुमपश्चिम र सल्यानमा १२–१२, मुगुमा १५, जुम्लामा १४, हुम्लामा १५, कालीकोटमा २०, जाजरकोटमा १२ र दैलेखमा १४ दलले निर्वाचनमा भाग लिने कार्यालय प्रमुख दुर्गा चालिसेले जानकारी दिए। उल्लेखित दलले मात्रै निर्वाचनमा चुनाव चिह्न पाउने र बाँकीले भने अन्य दलको चुनाव चिह्नमा निर्वाचन लड्नुपर्नेछ।

कर्णाली प्रदेशमा १० निर्वाचन अधिकृत फेरिएका छन्। यसअघिका निर्वाचन अधिकृतलाई हटाउँदै सरकारले नयाँ निर्वाचन अधिकृत खटाएकामा सल्यानको कुमाख र त्रिवेणी गाउँपालिका, कालीकोटको नरहरिनाथ, पलाता र सान्नीत्रिवेणी गाउँपालिका, हुम्लाको ताँजाकोट र सर्केगाड गाउँपालिका, जाजरकोटको कुसे र जुनीचाँदे गाउँपालिका र दैलेखको ठाटीकाँध गाउँपालिकामा नयाँ निर्वाचन अधिकृत खटाइएको छ।