टाइफाइडविरुद्धको खोप अभियानलाई सबैले सहयोग गरौं : प्रधानमन्त्री देउवा

काठमाडौं- प्रधानमन्त्री शेरबहादुर देउवाले चैत २५ देखि सुरु हुने टाइफाइड खोप अभियानमा सहयोग गर्न सबैलाई आग्रह गरेका छन्। 

टाइफाइडको खोप अभियान तथा राष्ट्रिय खोप कार्यक्रम शुभारम्भ कार्यक्रममा बोल्दै प्रधानमन्त्री देउवाले दक्षिण एसियामा नै पहिलोपटक नेपालमा खोप अभियान सुरु गर्न लागेकोमा खुसी व्यक्त गरे। 

नेपालमा टाइफाइड रोग जनस्वासथ्य समस्याको रुपमा देखिएको उनले बताए। टाइफाइडको लागि सबैभन्दा प्रभावकारी उपाए खोप भएकाले यो अभियानको सुरुवात गरिएको प्रधानमन्त्री देउवाले बताए।  

यस अभियानबाट झण्डै ७५ लाख बालबालिका लाभान्वित हुने बताउँदै  खोप अभियानमा सहयोग गर्न सबैलाई आग्रह गरे।

आजदेखि सुरु भएको खोप अभियान आगामी बैशाख २५ गतेसम्म चल्नेछ। यो अभियानको क्रममा १५ महिनादेखि १५ वर्ष उमेरसमूहका बालबालिकालाई दिइनेछ। 

नेपालमा पहिलो पटक यो खोप दिइन लागिएको हो। देशभरका झण्डै ७५ लाख बालबालिकालाई यो खोप दिने सरकारको लक्ष्य रहेको छ। 

नजिकैको खोप केन्द्रमा गएर खोप लगाउन सरकारले सबैमा अनुरोध गरेको छ। नेपालले पछिल्लो १० वर्षदेखि खोप लगाउने विषयमा गृहकार्य गर्दैआएको थियो। शुक्रबारबाट देशभरबाट खोप लगाउन थालिने छ।