श्रीलंकाको जस्तो आर्थिक संकट नेपालमा आउँदैन : पूर्वगभर्नर नेपाल

बुटवल– नेपाल राष्ट्रका पूर्वगभर्नर चीरञ्जीवी नेपालले नेपालको अर्थतन्त्र श्रीलंकाको जस्तो नहुने बताएका छन्।

पछिल्लो समय नेपालको अर्थतन्त्र कमजोर हुँदै गएको भन्दै चिन्ता व्यक्त भइरहेका बेला बुधबार रिपोर्टर्स क्लब लुम्बिनी प्रदेशले आयोजना गरेको साक्षात्कारमा पूर्वगभर्नर नेपालले श्रीलंकामा जस्तो आर्थिक अवस्था यहाँ नआउने बताएका हुन्।

‘श्रीलंकामा उत्तरपुस्तिका किन्ने पैसा नभएर सबै तहका परीक्षा रोकिएको जस्तो त यहाँ हुँदैन। तर आयातमा भन्दा निर्यातलाई जोड दिनुपर्छ,’ उनले भने। उनले सरकार रेमिट्यान्स बढाउन लागिपरेको भन्दै त्यसले केहि राहत पुग्ने बताए। स्थानीय तह र प्रदेश सरकार पनि केन्द्रमुखी मात्र नभई आत्मनिर्भर उन्मुख हुनुपर्ने नेपालको तर्क छ।

कर्जा विस्तार अहिलेसम्मकै सबैभन्दा धेरै ३२ प्रतिशत पुगेको उनले बताए। मुलुुकको आर्थिक अवस्था मजबुत बनाउनका लागि हरेक कुरामा संचितिकरण गर्नुपर्नेमा उनले जोड दिए। नेपालको अवस्था अवस्था ऋण तिर्न सक्ने रहेको भन्दै उनले यद्यपि ऋणमा मात्रै भर पर्न नहुनेमा जोड दिए। उत्पादन र निर्यातलाई उर्जाशिल बनाउने वाटोमा सरकार गम्भिर रुपमा अगाडि बढ्नुपर्ने उनले सुझाए।