नेपालगञ्ज–हुम्लाको हवाई भाडा साढे २१ हजारसम्म

सिमकोट– सरकारी स्वामित्वको नेपाल वायु सेवा निगमले नेपालगञ्जदेखि हुम्लाको हवाई भाडा २१ हजार ५०० रुपैयाँसम्म लिने गरेको पाइएको छ।

सहुलियत उडान कम गरिरहेको नेपाल एअरलाइन्सले हुम्लाका लागि चार्टर्ड उडान भर्दै एकजना यात्रुबाट १६ हजारदेखि साढे २१ हजार सम्म लिएको यात्रुको भनाइ छ। 

नेपाल एअरलाइन्सले नेपालगञ्जदेखि हुम्लाका लागि सहुलियतमा पाँच हजार ६०० लिँदै आएको भए पनि पछिल्ला केही दिनयता अन्य निजी एअरलाइन्सले उडान नगर्दा चार्टर्ड उडान भर्दै चर्को टिकट भाडा लिने गरेको हो। 

नेपालगञ्जदेखि अन्य निजी एअरलाइन्सले चार्टर्ड उडान भर्दा ११ हजार ६०० सम्म भाडा लिने गरेका थिए। तर नेपाल एअरलाइन्सले एक्कासि भाडादर बढाउँदा हुम्लाका नागरिक मारमा परेका छन्। यसरी चर्को टिकट भाडाले गर्दा गरिब, निमुखालाई थप समस्या बनाएको छ। राज्यले हुम्लालाई वास्ता नगरेको भन्दै यहाँका नागरिकले आक्रोश व्यक्त गरेका छन्।