पुरातात्त्विक संरचनाको निर्माण समयमै सम्पन्न गर्न मन्त्री झाँक्रीको निर्देशन

काठमाडौं- सहरी विकास मन्त्री रामकुमारी झाँक्रीले गुजेश्वरी फाँट र टेकु दोभानमा निर्माण भइरहेका पुरातात्विक संरचनाको निर्माणकार्य समयमा नै सम्पन्न गर्न निर्देशन दिएकी छन्। अधिकार सम्पन्न बागमती एकीकृत विकास समिति अन्तर्गत निर्माण भइरहेका पुरातात्विक महत्वका संरचनाको अनुगमन गर्दै यस्तो निर्देशन दिएकी हुन्। 

आयोजना क्षेत्र अस्तव्यस्त देखिएकाले यसबारे मन्त्रालयमा थप छलफल गर्ने समेत उनको भनाइ छ।'सत्तलमा आश्रित रहेका परिवारहरुको व्यवस्थानबारे मन्त्रालयले सकारात्मक पहल गर्नेछ। मन्त्रालयको एकल निर्णयले मात्र आश्रित परिवारको व्यवस्थापन गर्न गाह्रो हुने भएकाले सरोकारवाला निकायहरुसँग छलफल गरेर नयाँ ठाउँमा पुनर्स्थापना गर्न सकिनेबारे विकल्पका लागि मन्त्रालय तयार छ,' उनले भनिन्। 

अधिकार सम्पन्न बागमती एकीकृत विकास समितिका आयोजना प्रमुख नवराज प्याकुरेलले  पहिलो क्षेत्रको काम सम्पन्न भइसकेको  बताउँदै दोस्रो र तेस्रो साइट निर्माण कार्य करिब ७० प्रतिशत सकिएको जानकारी दिए। 

पुरातात्विक  र सांस्कृतिक संरचना निर्माण गर्नुपर्ने आयोजना भएकाले काम गर्न अत्यन्तै संवेदनशील र चुनौतीपूर्ण रहेको उनको भनाइ छ। आगामी असारसम्म आयोजनाको म्याद रहेकाले आफूहरु समयमै काम सक्न प्रतिबद्ध  रहेको बताउँदै प्याकुरेलले ताकेता गरिरहेको उल्लेख गरेका थिए।