प्रदेशको राजधानी र नामाकरणका लागि विशेष समिति गठन

धनगढी- प्रदेशको स्थायी राजधानी र नामाकरणका लागि प्रदेश ७ को संसदले विशेष सुझाव समिति गठन गरेको छ।
 
सोमबारको संसद बैठकमा सभामुख अर्जुन बहादुर थापाले प्रदेशको स्थायी राजधानी तोक्न र नामाकरणका लागि प्रतिवेदन पेश गर्न प्रदेश सांसद तारा लामा तामाङको संयोजकत्वमा पाँच सदस्यी बिशेष सुझाव समिति गठन गरिएको जानकारी दिए।

समितिमा प्रदेश सांसद प्रेमप्रकाश भट्ट, बलदेव रेग्मी, श्यामलाल राना र चुनकुमारी चौधरी सदस्य छन्। समितिमा रहेका श्यामलाल राना नेपाली काँग्रेसका तर्फबाट निर्वाचित सांसद हुन भने अन्य सबै नेकपाबाट निर्वाचित सांसद हुन्। समितिलाई यहि साउन २१ गते भित्र सरोकारवाला सबै पक्षसँग उपयुक्त छलफल गरि प्रतिवेदन पेश गर्ने जिम्मेवारी सभामुखले तोकेका छन्। 

समितिका संयोजक तारा लामा तामाङले सभामुखसँग परामर्श गरि कार्यबिधि तयार गर्ने बताए। उनले भने–‘हामीलाई तोकिएको समय भित्र सरोकारवाला सबै पक्षसंग छलफल गरि विवादरहित स्थान र नामाकरण सहित प्रतिवेदन पेश गर्ने प्रयत्न गर्नेछौं।’ 

झण्डै एक महिना अघि प्रमुख प्रतिपक्ष दल नेपाली काँग्रेसले प्रदेश सभा संचालन भएको लामो समय बितिसक्दा पनि राजधानीको स्थान र नामाकरणबारे छलफल शुरु नभएको भन्दै संसद सचिवालयमा प्रस्ताव दर्ता गराएको थियो।

हाल प्रदेश ७ को अस्थायी राजधानी कैलालीको धनगढीमा रहेको छ। स्थायी राजधानीका लागि कैलालीकै अत्तरिया र डोटीे दिपायलको पनि चर्चा चलेको छ।