देश, लोकतन्त्र र संविधानका निम्ति केपी ओली घाँडो हुन् : माधव नेपाल

विराटनगर– नेकपा एकीकृत समाजवादीका अध्यक्ष माधवकुमार नेपालले केपा एमाले अध्यक्ष केपी ओली सबैका लागि घाँडो भएको टिप्पणी गरेका छन्। सोमबार विराटनगर विमानस्थलमा पत्रकारसँगको कुराकानीमा अध्यक्ष नेपालले सो कुरा बताएका हुन्। 

उनले भने, ‘देशका निम्ति, लोकतन्त्र र संविधानका निम्ति केपी ओली घाँडो हुन्।’ ओली परिवर्तन विरोधी भएको आरोप पनि उनले लगाए। आगामी निर्वाचनमा बामपन्थको नाममा बर्को ओढेकाहरुलाई पराजित गर्नुपर्ने उनको भनाइ छ। 

आगामी वैशाख ३० गते हुने स्थानीय तहको निर्वाचनमा मिल्नेसम्म गठबन्धन हुने उनले बताए। अध्यक्ष नेपालले भने, ‘आवश्यकताका आधारमा कहाँसम्म मिल्छ, त्यहाँसम्म गठबन्धन हुन्छ।’ नेपाली कांग्रेसभित्र स्पष्ट रुपमा दुई धार रहेको अध्यक्ष नेपालले बताए। गठबन्धन गर्नुपर्छ भन्नेलाई सँगै लैजानुपर्ने र नगरौं भन्नेलाई एक्लै उठ्न दिनुपर्ने उनको भनाइ छ। अध्यक्ष नेपालले भने, ‘गठबन्धन गर्नु हुँदैन भन्नेलाई एक्लै उठ्न दिनुपर्छ।’

पूर्वप्रधानमन्त्री समेत रहेका नेता नेपालले प्रधानमन्त्री शेरबहादुर देउवाले भारत भ्रमणका क्रममा भाजपाको पार्टी कार्यालय जानु ठिक नभएको बताए। आफूलाई सो कुरा व्यक्तिगत रुपमा ठिक नलागेको उनले बताए। उनले भने,‘ म पनि प्रधानमन्त्री भइसकेको व्यक्ति हुँ। देशको प्रतिनिधि भएर पार्टी कार्यालय जानु ठिक भएन। पार्टीगत रुपमा भाजपाको कार्यालय गएको भए ठिकै हो।’