लागूऔषधसहित दुई जना पक्राउ

काठमाडौं- प्रहरीले भक्तपुर र मकवानपुरबाट लागूऔषधसहित दुई जनालाई पक्राउ गरेको छ।

भक्तपुर सूर्यविनायक नगरपालिका-५ कटुन्जेबाट करिब पाँच किलोग्राम अवैध लागूऔषध गाँजासहित सोही ठाउँ बस्ने ५८ वर्षीय दिनेश ढुंङ्गेललाई आइतबार दिउँसो प्रहरीले पक्राउ गरेको हो। 

महानगरीय प्रहरी परिसर भक्तपुरबाट खटिएको प्रहरीले दिनेशको घर तलासी गर्दा लुकाई राखेको अवस्थामा उक्त गाँजा फेला पारी उनलाई पक्राउ गरेको जनाएको छ।

यस्तै मकवानपुर मनहरी गाउँपालिका-६ लोथरबाट करिब ९० किलोग्राम लागूऔषध गाँजासहित भारत मोजफपुर बस्ने ३५ वर्षीय असगर अलीलाई आइतबार साँझ प्रहरीले पक्राउ गरेको छ। 

बिआर २५ जिए ३०९२ नम्बरको ट्रकलाई इलाका प्रहरी कार्यालय मनहरीबाट खटिएको प्रहरीले जाँच गर्ने क्रममा ट्रकभित्र उक्त गाँजा फेला पारी ट्रक चालक असगरलाई नियन्त्रणमा लिएको हो। दुबै घटना बारे आवश्यक अनुसन्धान थालिएको प्रहरीले जनाएको छ।