डुबेर चार जनाको मृत्यु

काठमाडौं- देशका विभिन्न स्थानमा डुबेर चार जनाको ज्यान गएको छ।

झापा दमक नगरपालिका-५ बस्ने पुष्पकुमार राईका १४ वर्षीय छोरा रोहन राईको डुबेर ज्यान गएको छ। सोही नगरपालिका-२ सत्यहाङ कोलेनी नजिकैको सिपेनी सिमसारमा पौडी खेल्ने क्रममा शुक्रबार दिउँसो डुबेर मृत्यु भएको प्रहरीले जनाएको छ। 

चितवन माडी नगरपालिका-१ पाण्डवनगर बस्ने दीपक बोटको दुई वर्षीय मनिष बोटको सोही ठाउँस्थित रिऊ खोलामा खेल्ने क्रममा शुक्रबार दिउँसो डुबेर ज्यान गएको छ।

दाङ राप्ती गाउँपालिका-१ भालुबाङस्थित राप्ती नदीमा नुहाउने क्रममा डुबेर अर्घखाँची सितगंगा नगरपालिका-८ लापे बस्ने कृष्ण बिककी छोरी १३ वर्षीया अञ्जली बिकको शुक्रबार साँझ मृत्यु भएको छ। 

तनहुँ शुक्लागण्डकी नगरपालिका-१० साखे बस्ने ५ वर्षीय शुबम थापाको सोही ठाउँस्थित काङ्दी खोलामा पौडी खेल्ने क्रममा शुक्रबार बिहान डुबेर मृत्यु भएको छ। 

डुबेर अशक्त अवस्थामा फेला परेका उनको पोखरा स्वास्थ्य विज्ञान प्रतिष्ठान रामघाटमा उपचारको क्रममा मृत्यु भएको हो।