बिरामीको मृत्युपछि अत्तरिया तनावग्रस्त [तस्बिरहरू]

अत्तरिया- कैलालीको अत्तरिया तनाबग्रस्त बनेको छ। अत्तरियामा रहेको पदमा अस्पतालमा उपचाररत एक बिरामीको ज्यान गएपछि अवस्था तनाबग्रस्त बनेको हो।

शनिबार बिहानैबाट यहाँको अवस्था तनाबग्रस्त बनेको छ। कैलालीको गोदावरी नगरपालिका वडा नम्बर ३ का बिरामी बिनोदकुमार बोहराको उपचारका क्रममा आज बिहान मृत्यु भएको हो। 

झाडापखाला भएर अस्पतालमा उपचारका लागि आएका र चिकित्सकको लापरबाहीले उनको मृत्यु भएको आफन्तको आरोप छ। उनको निधन भएपछि आफन्त आक्रोशित बनेका छन्। अस्पतालमा तोडफोडसमेत भएको छ। जसका कारण अवस्था तनाबग्रस्त बनेको हो।

अस्पताललाई अहिले प्रहरीले नियन्त्रणमा लिएको छ। प्रहरीले दुई राउन्ड अश्रुग्यास प्रहार गरेको छ। स्थानीयले प्रहरीले ताकेर अश्रुग्यास प्रहार गरेको भन्दै विरोध जनाएका छन्। अहिले धनगढी रोड पूर्ण रूपमा बन्द गरिएको छ। गोदावरी नगरपालिकाका प्रवक्ता शर्मानन्द भट्टले समस्या सामाधानको लागि छ्लफल भइहेको बताएका छन्।

 तस्बिर सौजन्य : पत्रकार हेमराज भट्ट